Monday, May 9, 2011
PATAY ang usa ka lider sa tribal group human gipusil sa duha ka wala mailang suspetsado niadtong Domingo mga alas 12:40 sa udto sa Zone-2, Cugman ning siyudad sa Cagayan de Oro.
Nahitabo ang insidente sa Cugman National High School samtang ang biktima nga mao si Rodulfo L. Asiñero, 64, minyo, ug nailang si Datu Nomomba, residente gihapon sa susamang dapit.
Who do you think Manny Pacquiao should fight next? Join our poll.
Si PO1 Judith Eballe sa Police Station 10 (PS10) sa Cugman nga nahinabi sa Sun.Star Superbalita niingon nga nagpatawag ang biktima og tribal meeting niadtong tungora.
Nagpaabot ang biktima sa iyang mga miyembro dihang kalit lang nga mihunong ang usa ka motorsiklo sakay ang duha ka mga lalaki diin ang backrider maoy nipusil sa ulo sa biktima nga milahos sa atubangan nga bahin.
Daling misibat ang mga suspek nga nagsu-ob og dirty white nga kalo, dirty white nga jacket ug nakapantalon.
Ang pipila sa mga miyembro nga paingon na unta sa meeting ang nakabantay sa hitabo ug nakakita sa biktima nga nagbuy-od tungod sa gilingkoran niini ug wala nay kinabuhi.
Miresponde ang mga sakop sa PS10 ug ilang naabtan ang biktimang wala nay kinabuhi ug nakuha ang usa ka basyo sa bala sa kalibre .45.
Base usab sa pamayag sa igsuon niini, ilang gikasubo ang nahitabo sa biktima labina nga buotan ug mao man kini nga tawo. Wala silay nadungog nga kaaway niini ug wala usab kini nakasulti nga nakadawat og bahad sa wala pa nahitabo ang insidente. Gawas lamang nga nakigbisog kini sa ektaryang yuta nga maangkon sa tribu niini. Daw ang maong yuta kumpleto sa papeles ug giingong giangkon ning panahona.
Padayon pa sa pag-imbestigar sa kaso ang kapolisan ning panahona ug gitun-an ang anggulong ilang gilantaw.
Ang patayng lawas gidala karon sa Bollozos funeral parlor samtang nanawagan sa hustisya ang mga kabanay niini.(Stephanie V. Berganio)
Gipatik sa mantalaang SuperBalita Cagayan de Oro Mayo 10, 2011.Linkback:
https://tubagbohol.mikeligalig.com/index.php?topic=40666.0
