HUMAN sa sunod-sunod nga kasong pagpanglugos, laing 13 anyos na usab ang gilugos sa 16 anyos niadtong nilabayng adlaw sa lungsod sa Tagoloan, Misamis Oriental.
Nahitabo ang insidente sa dike nga bahin sa Poblacion sa maong dapit.
Si PO1 Angel Gungob, kinsa investigator sa Womens and Children Protection Desk (WCPD) sa Tagoloan Police Station, nibutyag sa Sun.Star SuperBalita nga kagahapon migawas ang resulta sa medical examination sa 13 anyos ug positibo kining nalugos.
Nasayran nga susama ang tunghaan sa suspetsado ug biktima.
Nasayran nga magsige og panguyab ang 16 anyos ngadto sa biktima apan nibalibad ang 13 anyos nga maoy posibleng hinungdan nga nahitabo ang pagpanglugos.
Wala pa masikop ang suspetsado apan gikatakdang pasakaan og kaso karong adlawa.
Matud ni Gungob nga ning bulan lamang sa Oktubre kini mao ang ika-tulo nga kaso sa pagpanglugos ang natigayon sa area lamang sa Tagoloan ug gikaalarma na pag-ayo sa kapolisan ang maong insidente.
Gani gipanawagan ni Gungob nga unta kung dunay susamang hitabo, deretso kini nga itaho sa kapolisan ug dili na ipalapas sa 24 oras aron deretso nga masikop ang suspetsado.
"Labina nga kung late na nga gitaho, dili na usab puwedeng sikopon ang suspetsado kay adunay man sab balaod nga gisupak." (Stephanie V. Berganio) - Sun Star
Linkback:
https://tubagbohol.mikeligalig.com/index.php?topic=33606.0
