Ni Brenda D. Batuto/WC (Banat) Updated May 16, 2011 12:00 AM
CEBU, Philippines - Nalingaw kaayo og katawa ang mga molupyo sa dakbayan sa Talisay dihang nakita nila si Mayor Socrates Fernandez nga nagsul-ob og crash helmet bisan og walay gikabay-ang motorsiklo sa pagduaw niini kang Joavan Fernandez nga iyang sinagop kinsa natanggong sa prisohan human kini hidakpi sa kapolisan sa dakbayan sa Sugbo sa miaging adlaw.
Ang mga magbubuhis nga Talisaynon nakapangutana nganong nagsul-ob sa iyang helmet ang mayor nga unta ang helmet alang ra man sa mga tawong magsakay og motorsiklo.
Ang mayor sa Talisay nakuhaan og eksina sa mga balita sa television nga migawas kini sa iyang service vehicle nga nagsul-ob og dako kaayong helmet. Sa laing bahin, dili lang mga Talisaynon ang nakatawa sa gihimo sa mayor apan dunay uban nga misabot ug naluoy sa iyang kahimtang.
Kahinumdoman nga si Joavan nasikop sa mga sakop sa Criminal Investigation and Detective Management Branch atubangan sa Palace of Justice sa dakbayan sa Sugbo sa miaging Huwebes.
Ang nahisgutang mga polis dunay warrant of arrest sa pagdakop sa sinagop sa mayor sa Talisay sa kaso nga pagdusmog niini sa sakyanan sa kapolisan sa dakbayan sa Sugbo sa miaging buwan.
Apan niadtong Biyernes sa buntag si Joavan mipiyansa og P12 mil ngadto sa sala ni Judge Pamela Baring-Uy sa Branch 6 sa Municipal Trial Court in Cities alang sa iyang temporaryong kagawasan.
Hinuon ang ubang tigpaniid nagkanayon nga ang pagsul-ob og helmet ni mayor Fernandez bisan kun sirado kaayo ang iyang sakyanan nga may upat ka ligid paniguro lang nga kun madisgrasya siya samtang magmaneho sa iyang sakyanan dili mabukolan ang iyang ulo. - BANAT NEWS
Linkback:
https://tubagbohol.mikeligalig.com/index.php?topic=40780.0
