MikeLigalig.com

Ni Stephanie Viovicente-Berganio
Saturday, June 9, 2012


NAHADLOK pag-ayo ang usa ka tinun-an human nailad sulod mismo sa tunghaan niadtong Huwebes mga alas 2 sa hapon sa City Central School, Velez St., ning siyudad sa Cagayan de Oro.

Biktima tagoan na lamang sa ngalan nga Sandy, 11, tinun-an sa Grade 6 sa maong tunghaan ang nisaysay nga pagawas na siya niadtong tungora sa ilang lawak miduol kaniya ang usa ka babaye nga nagpatuong magtutudlo.

Nakighinabi kini kaniya ug naghangyo nga ubanan kini tungod kay adunay ipanghatod nga t-shirt.

Misugot usab si Sandy ug niuban niini sa lawak sa Grade III.

Apan paghidangat sa dapit, wala siyay nakita nga mga t-shirt ug kalit lang kining pinasingka nga nanghulam sa iyang cell phone.

Nananghid kaniya nga palodan usa niini ang iyang cell phone kay adunay tawagan apan sa paghulat sa biktima pipila ka minuto wala na kini mahibalik.

Uwahi na nga nadiskubre ni Sandy nga nailad siya niini dihang wala na mibalik ang babaye.

Gihulagway ni Sandy nga naka stripe og kolor blue ug white ang t-shirt sa suspek, nagsul-ob og backpack, nakakalo ug nakapantalon.

Si Senior Police Officer 4 Roberto Cambi sa Police Station 1 (PS1) sa Divisoria nga nahinabi sa Sun.Star SuperBalita niingon misugod gyod dayon sa pagpangilad kining suspetsado tungod kay ilang nahuna-hunaan nga posibleng wala pa na briefing ang mga tinun-an kalabot unsaon paglikay niining mga mangingilad ug k******n.

Matud ni Cambi nga gipasabot na nila ang mga magtututdlo nga pasabton ang ilang mga tinun-an ug i-aware niniing mga dili maayong binuhatan.

Nasayran nga adunay mga magtutudlo usab nga maglibot ug magpasabot sa mga tinun-an kalabot niini apan kay bag-o pa man nagsugod ang klase wala pa nalibot ang tibuok tunghaan kalabot niini.

Tambag lamang ni Cambi sa mga ginikanan nga sultihan ang mga anak bisan asa man kini nagtungha, pribado man o publiko nga dili gyod makigsulti sa mga estranghero ug wala maila bisan pa magpaila kini og si kinsa.

Mahimo man moingon ang mga bata nga didto patabang sa guwardya o polis nga naa sa gawas, puwede usab balibaran.

Kinahanglan usab sa mga magtutudlo nga magsul-ob og ID sa tunghaan aron mas mailhan sa mga tinun-an kung kini maestra o dili.

Dugang ni Cambi nga ila usab gipahimangnoan ang mga security guards nga dili magkompiyansa ug kinahanglan estrikto sa pagpasulod sa bisan kinsa. Mahimo nga mag logbook, sitahon ug susihon ang bisan kinsa nga mosulod ug pasabton ang mga ginikanan kay kaayohan lamang sa ilang mga anak ang tinguha.

Nanghinaot si Cambi nga unta dili na mahitabo ang susamang insidente ug magsilbi kining leksyon nga unta ang mga kabataan dili magsalig sa bisan kinsa labina dili kaila.

Gipatik sa mantalaang SuperBalita Cagayan de Oro Hunyo 09, 2012.

kalooy bataa sobra ka kompyansa   

basta makabasa kog ingon ani, kabuhion dayon kong maghunahuna intawon sa among 10-year-old.  sugot na lang kog iyang cellphone kuhaon, ayaw lang tawon nga siya mismo.