Ni Jojo C. Ugdol/EIM (Banat) | Updated July 2, 2015 - 12:00am
CEBU, Philippines - Bisan nakaposas nakahigayon pa gihapon pag-eskapo ang usa ka piniriso gikan sa selda sa kapulisan sa lungsod sa San Francisco atol sa pagbundak sa kusog nga ulan pasado alas- 2 sa nakalabay nga kaadlawon.
Ang nakaeskapo mao si Rafael Montalban, 19, taga Barangay Sunog sa maong lungsod nga duna’y kaso’ng pagpanglungkab.
Gitug-an ni Police Officer 2 Roldan Florentino sa San Francisco Police Station nga nahinabi sa Banat News giposasan nila si Montalban diha sa sud sa karsel tungod kay nisulay na kini pag-eskapo niadtong nakalabay nga adlaw pinaagi sa pagguba sa kisame sa ilang selda.
Duha lang ka piniriso ang anaa sa selda nga mao si Montalban ug si Elesar Ostria nga usa sa mga suspetsado sa pagpamusil ni PO1 Demar Muaña.
Atol sab sa maong hitabo duha lang ka polis ang nabilin sa ilang buhatan nga sila si PO2 Crisologo Billocura nga mao’y gitahasan nga magbantay sa mga piniriso ug PO2 Roldan Juban sanglit ang ubang mga polis nag-follow up sa pagpamusil kang PO1 Muaña.
Nasuta nga gipalusot ni Montalban ang iyang kamot gikan sa posas ug paspas nga mikatkat sa kisame sa selda ug gibungkag niini ang nipis kaayong sementadong paril aron makagawas.
Si Ostria dali untang mialerto sa mga polis apan di madungog iyang singgit kay kusog kaayo ang pagbunok sa uwan. Sa pagkutlo niini nga balita wala pa gihapon nadakpan pagbalik ang suspetsado. (BANAT NEWS)
Linkback:
https://tubagbohol.mikeligalig.com/index.php?topic=80326.0
