MikeLigalig.com

Ni JOHN PAUL V. PEPITO


USA ka 50 anyos nga lalake ang gigulgulan sa iyang ulo-patay human makabikil niini ang iyang kaila sa Sitio Looc, Barangay Maribago, dakbayan sa Lapu-Lapu ka­gahapon sa kaadlawon.

Ang biktima mao si Raymundo Garbo, 50, tighimulbol og patay nga manok sa sabungan, ug nanimuyo sa dapit sud pa sa tulo ka buwan.

Matod ni PO2 Joseph Cutanda, imbestigador sa Lapu-Lapu City Police Office (LLCPO) nga si Garbo giputla’g ulo sa kaila niining mag-uyuan nga sila si Roldan Pangatungan, 36, pag-umangkon ni Leonilo Pangatuhan, 50.

Ang hitabo nakapalisang mismo sa mga residente sa dapit mga alas 6:30 sa buntag human nakit-an niini ang nagbuy-od nga lawas ni Garbo, kinsa naka-maong nga shorts apan wa nay t-shirt ug wa na sab iyang ulo.

Mga alas 10:40 sa bun­tag, usa pa nakit-an ang ulo sa biktima nga naa sa usa ka septic tank, mga 150 metros gikan sa iyang lawas.

Gihulagway sa mga taga Homicide Section nga may dinuslakan ang usa ka mata ni Garbo sa pagkarekober sa ulo niini.

Base sa pakisusi sa Superba­lita Cebu, ubos sa impluwensya sa ilimnong makahubog ang mga suspek.

Mismong si Roldan ang miangkon sa kapulisan nga siyay niunay og luglog sa liog sa biktima hangtod nga kini naputol samtang gihimakak ni Leonilo nga nitabang siya og gulgol.

Matod pa nga pag-uli sa mag-uyuan gikan sa diskuhan sa Sitio Jagna sa samang barangay, niagi sila sa balay ni Garbo.

Giingong kalit nga gidukol ni Raymundo si Roldan hinungdan sa ilang panaglalis nga niresulta sa komosyon diin miapil og kulata si Leonilo sa biktima.

Sumala pa ni Cutanda nga nisud si Roldan sa barongbarong ni Garbo ug nikuha og kutsilyo nga maoy gigamit niini sa krimen.

Nailhan sila si Roldan ug Leonilo nga may kalambigitan sa krimen tungod kay adunay sili­ngan si Leonilo nga nakakita niini nga nisud sa balay nianang pagkakaadlawon nga igo nalang nag-brip.

Nasuta usab sa Superbalita Cebu nga na-trace sa kapulisan ang nawala nga shorts ni Leonilo sa balay sa iyang si­lingan nga si Flora Paquibot, kinsa gikawatan sa maong suspek og tsinelas nga narekober ra sab sa balay ni Leonilo.

Nunot sa kabag-o pa sa lugar sa biktima, pabiling wa nahibawo ang mga silingan niini kon diin kini lumad nga lugar.

Adunay niingon nga gikan kini sa Davao, Mandaue ug Consolacion.

May mga tabitabi usab ang mga silingan sa biktima nga may napatay na kini niadto.

Ang mga suspek kasamtangang gibalhug sa prisuhan ug gikatakdang pasakaan og murder, dugang ni Cutanda.


Gipatik sa mantalaang Superbalita Cebu Agosto 22, 2016.

Linkback: https://tubagbohol.mikeligalig.com/index.php?topic=82685.0