6 na ang patay sa `milkshake’
SuperBalita Cebu
Tuesday, July 20, 2010 DUNAY dugay nang gikabuangan nga kombinasyon sa duha ka matang sa drugas ang pipila ka mga drug addict sa dakbayan sa Sugbo nga mag-anhaan sa Brgy. Kamagayan.
Apan kuyaw kini kay unom na ka mga tawo ang nangamatay sa gitawag og milk shake, drugas nga kombinasyon sa shabu ug nubain.
Kini ang gikompirmar ni Brgy. Kapitan Tony Avila sa interbyu sa Sun.Star Superbalita.
Matod pa ni Avila nga dugay na nga nauso sa mga tiggamitan og illegal nga drugas sa iyang barangay ang milk shake.
Iya kining nasayran usab gikan sa mga drug dependent nga gi-interview sa mga sakop sa Cebu City Health Department.
“Maminaw man ko sa interview nila. Ang shabu ibutang sa kutsara, i-dangdang sa lighter ug kon malanay na ang shabu, sagulan og nubain. Unya pasuyopan dayon sa syringe ug itusok,†pasabot sa kapitan kalabot sa pag-andam sa mao nga drugas.
Ang makatilaw sa milk shake mahimong sabog gikan sa tulo ngadto sa lima ka mga adlaw, dugang ni Avila.
Siya niingon nga usa sa mga biktima sa drugas mao ang iyang silingan nga namatay kay naughan og tubig ang utok.
Matod niya nga adunay uban nga drug user nga buhi pa karon apan mihugo na ug ug nalisoan sa pangisip.
Linkback:
https://tubagbohol.mikeligalig.com/index.php?topic=30617.0
