Ni Brenda D. Batuto (Banat) Updated June 25, 2011 12:00 AM
CEBU, Philippines - Bisan pa og gibasura sa korte ang injunction order aron dili masirad-an karong June 28 ang Tabunok Public Market sa dakbayan sa Talisay padayon ang mga vendors sa ilang pagsupak sa pagbalhin kanila ngadto sa bag-ong merkado sa barangay Lagtang.
Gipakita nila kini niadtong Miyerkules pinaagi sa pag-rally ug gikatakdang subling magprotesta sa adlaw sa pagpapahawa na gyud kanila gikan sa maong merkado pinaagi sa paglusad og kaugalingong bersyon sa “people power.â€
Si Sherwin Echavez, bise presidente sa dry good section ug media spokesperson sa kahugpongan sa mga vendors nagkanayon respetuhon nila ang hukom sa korte apan wala sila batia og kahadlok ug mipadayag nga modangop sila sa Court of Appeals.
Ang mga vendors mipasangil nga gitumban ang ilang tawhanong katungod sa mga opisyal sa siyudad.
Apan gipasabot ni Echavez nga dili sila maghimo og mga bayolenteng lihok atol unya sa ilang ‘people power’ kay igo ra silang mopadayag sa ilang katungod sa pagsupak sa plano sa siyudad. Sa gipahigayong press conference, si Mayor Socrates Fernandez nagkanayon nga kung dunay balido nga yangungo ang mga vendor nga dili una sila balhinon karong Hunyo 28, 2011 diha sa bag-ong merkado ilahang lugwayan ang gikatakdang adlaw apan kung dili balido ang mga yangungo ang merkado sa Tabunok siradohan na gyud sa siyudad.
Matud sa mayor nga ang mga vendors nga mobalhin diha sa Lagtang dili paabangon sa ilang mga stalls sulod sa tulo ka buwan ug ang siyudad pa maoy mohatag og sakyanan nga masakyan sa pagbalhin unya sa mga vendors.
Ang balhinang merkado mas lapad tungod kay 2.7 ektarya kini ikumparar sa merkado sa Tabunok nga 1.3 ektarya lang, aduna sad kini parking lot nga mas lapad usab sa parkingan sa Tabunok.
Gisalikway usab ni Fernandez ang kabalakang malunopan sa sapa sa Mananga ang maong merkado sanglit nasusi na kini ug gihatagan og Environmental Compliance Certificate (ECC) gikan sa Department of Environment and Natural Resources (DENR). Ang bag-ong merkado adunay 72 ka mga stalls sa meat section, 86 sa fish section, sa dry goods adunay 161 ka mga stalls ug sa D dunay 52 ka mga stalls ug 300 ka mga tarima alang sa prutasan ug mga buwak.
Sa pagkakaron 139 pa ka mga vendors ang misumitir sa ilang nga rekisitos aron makaukopar kini diha sa bag-ong merkado.
Ang siyudad padayong nagpaabot sa mga vendors nga mosumitir sa ilang rekisitos ug bukas kini alang niadtong buot nga mo-aplay kung dili mokuha ang mga kanhi vendors sa Tabunok. (EIM) - (BANAT NEWS)
Linkback:
https://tubagbohol.mikeligalig.com/index.php?topic=41898.0
