SuperBalita Cebu
Ni Guam P. Logroño
Friday, April 11, 2014
MAORAG na-lechon nga buhi ang manakaay ibabaw sa punoan sa lubi human siya aksidenting nakuryentihan kagahapon sa alas 11 sa buntag sa Barangay Suba, Samboan, Sugbo.
Ang lawas ni Ryan Toco, 32, minyo, taga Sitio Tagaytay, Barangay Ambigong, Samboan napaig, nibuto ang lapa-lapa sa duha ka mga tiil ug mga palad sa mga kamot tungod sa kakusog sa 13,000 volts sa kuryente gikan sa mainline sa Cebeco 2.
Si PO2 Ressel Jabagat, imbestigador sa Samboan Police Station nga nahinabi sa dySS Super Radyo ug Sun.Star Superbalita, nagkanayon nga si Toco gisuhulan ni Jose Gomes alang sa pagsaka sa lubi aron sa paghimog kopras.
Apan human sa pagkuha sa mga bunga sa lubi, iyang gilimpiyohan ug gipamutlan og mga palwa.
Apan dihang kini nangatagak, nasangit sa mainline wire sa kuryente hinungdan nga mikirig ang biktima.
Si Gomes nga nakakita, dali unta mipaduol sa punoan sa lubi apan mi-ground kini bisan kon siya nagsul-ob og boots nga goma.
Tungod niini, nangayo siyag panabang sa ilang mga silingan, nanawag og police ingon man personnel sa Cebeco aron tabangon ang biktima nga nipilit sa ibabaw sa lubi.
“Mura naman siyag estatuwa sa ibabaw sa lubi. Mipilit gyud unya ang pikas kamot nagkupot pa sa sanggot nga ang puan nasunog samtang maayong pagkapaig sa tibuok lawas,†hulagway ni Jabagat.
Gipadayag niya nga gitabang gihapon ang biktima, gisaka sa mga personnel sa Cebeco, gikuha dayon gidala sa tambalanan sa Malabuyoc, apan patay na kini.
Matod ni Jabagat nga tungod sa kakusog sa boltahe sa kuryente, nigahi og maayo ang biktima, apan wa matagak.
Wala hinuon masunog ang iyahang sapot, ingon man ang punoan sa lubi pero ang lawas niini napaig.
Si Jabagat miingon nga si Gomes ug asawa ni Toco nga si Merlinda, uban sa mga kabanay, nagkasabot kagahapon sa udto sa police station nga di na lang mosang-at sa reklamo kay aksidente ang nahitabo.
Tungod niini, si Gomes nipasalig sa asawa ug sa mga kabanay nga abagahon niya ang tanang gasto sa pagpahiluna sa lawas sa biktima hangtud sa paglubong niini.
Sa ilang nakuhang impormasyon, ang biktima ug ubang manakaay og lubi sa ilang dapit dunay P200 nga sweldo sa usa ka adlaw.
Linkback:
https://tubagbohol.mikeligalig.com/index.php?topic=78123.0
