Ni Romeo T. Limpangog/WC (Banat) Updated June 13, 2011 12:00 AM
CEBU, Philippines - Samdan sa dughan ang usa ka tawo nga gidunggab og tigib sa ig-agaw ra usab niini didto sa sitio Ibabao, barangay Basak, dakbayan sa Lapulapu sa miaging gabii.
Ang biktima mao si Joevil Dano, alyas Alex, 31, ulitawo nga taga barangay Marigondon sa maong dakbayan ug ang nakadunggab mao si Avelino Dano, 56, minyo nga taga sitio Abuno, barangay Pajac sa mao gihapong dakbayan.
Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga nag-inom ang biktima ug ang suspetsado sa nahisgotang dapit ug dihang nangahubog na kalit lamang nga nagkalalis.
Matud pa ni PO2 Jocotan nga gumikan sa kainit sa lalis naupsan sa pasensya ang suspetsado unya nakapunit kini og tigib nga maoy gihansak sa dughan sa biktima.
Human sa maong pagdunggab misibat dayon ang suspetsado pahilayo sa maong dapit apan si PO2 Erwin Hadumo nga nadistino sa Cebu Provincial Police Office (CPPO) nga nahiagi nga nakakita sa biktima nga nagkadugo dali nga midala niini sa barangay Hall ug ang mga barangay tanod na maoy nagdala sa biktima ngadto sa Lapulapu City District Hospital.
Dugang pa ni PO2 Jocotan nga nasikop usab dayon ang suspetsado dihang milihok ang kapolisan sa Presinto 4 nga naglangkob kanila ni PO2 Miguel Ramas ug mga kauban busa gibalhog dayon ang suspek sa bilanggoan. - BANAT NEWS
Linkback:
https://tubagbohol.mikeligalig.com/index.php?topic=41593.0
