Nila ni Sanden Anadia ug Bong Soriano (Banat) Updated August 13, 2011 12:00 AM
CEBU, Philippines - Gimando ni Mayor Michael Rama ngadto sa hingtungdang departamento sa city hall ang pagpamutol sa tanang punoan sa kahoy nga maghatag og peligro sa kinabuhi sa tawo ning dakbayan sa Sugbo.
Gumikan niini milihok dayon si Alvin Santillana, hepe sa Local Disaster Risk Reduction and Management Council aron ang tanang punoan sa acacia ug buli nga karaan na kaayo habason usab.
May listahan na sila karon sa 53 ka mga punoan sa buli nga nahimutang sa Pardo, Mambaling, Calamba, Inayawan, Banilad , ug Tejero nga gitakda nilang puohon.
Giawhag usab sa mayor ang katawhan nga motabang og paniid sa mga kahoy nga anaa sa ilang mga tugkaran o agianan kun lig-on pa ba kini.
Kun ugaling kadudahan na ang punoan sa maong kahoy kinahanglang ipahibawo dayon kini sa ilang mga opisyal sa barangay aron ang maong mga opisyal mao nay mopadangat niini ngadto sa city hall.
Dili na gusto si Rama nga masubli pa ang nahitabo kang Clenio Bontuyan kinsa namatay human kini dat-ugi sa acacia atubangan sa Zapatera Elementary School sa barangay Zapatera ning dakbayan sa Sugbo niadtong Miyerkules sa hapon.
Sa laing bahin susama og plano si Rama ug si Mayor Jonas Cortes sa dakbayan sa Mandaue kinsa mipahabas usab sa mga karaang punoan sa acacia ug mga buli.
Nasayran nga gimandaran dayon ni Cortes ang tanan niyang kapitan sa barangay sa pagsil-ing sa mga dagkong punoan sa acacia ug buli sa ilang taga-tagsa ka hurisdiksyon aron ipaputol kini.
Matud pa ni Konsehal Ernie Manatad, Presidente sa Association of barangay Councils sa Mandaue nga silang tanan andam nga motuman sa maong mando sa mayor. (BANAT NEWS)
Linkback:
https://tubagbohol.mikeligalig.com/index.php?topic=42889.0
