http://www.sunstar.com.ph/Monday, June 22, 2015
Ni JEEPY P. COMPIO
USA ka babaye ang nagpatala sa Buhangin Police Station sanglit gipakanaog siya sa iyang gisakyan nga van tungod sa iyang katambok.
Alas 7:00 sa buntag niadtong Dominggo, midangop sa presinto singko si Marissa (bansagon gitago), nagpuyo sa Champaca Street, El Rio Subdivision, Barangay 19-B Poblacion, aron ipatala ang drayber ug konduktor sa van nga iyang gisakyan.
Sa impormasyon nga nakalap sa Sun.Star SuperBalita gikan sa Buhangin Police Station, nasayran nga misakay si Marissa og van padung Tagum City.
Giingon nga sa dihang pagsakay niya, nagbagutbot na ang konduktor kay moukopa og duha ka tawo ang iyang gilingkuran.
Saysay ni Marissa sa pulis nga pabayaron siya sa konduktor alang sa duha ka tawo apan usa lang ang iyang bayran kay natural na kaniya ang iyang gidak-on.
Dihang nagdumili si Marissa sa pagbayad sa dugang usa ka plitehan, giingong gipanaog siya sa konduktor didto sa bus waiting station sa Panacan.
Sa kapungot ni Marissa, midangop kini sa Buhangin Police Station ug iyang gipatala ang plate number sa maong van aron masubay ang konduktor ug drayber nga manubag sa iyang katungod.
Linkback:
https://tubagbohol.mikeligalig.com/index.php?topic=80261.0
