Ni STEPHANIE V. BERGANIO
GIHIMAKAK sa kapolisan ang alegasyon nga gipadagan-dagan sa plaza ang suspetsado sa pagpanglugos diha sa lungsod sa Tagoloan, Misamis Oriental.
Sa pakighinabi sa Sun.Star SuperBalita ngadto kang Police Senior Inspector Maricris Mulat, kinsa hepe sa Tagoloan Police Station, giklaro niini nga walay kamatouran ang maong report.
Matud ni Mulat nga dihang ilang nadakpan ang suspetsado nga giilang si Jaguar Salvaña, 23, adunay kapuyo, residente sa susamang dapit, ila una kining gidala sa tambalanan aron ipakita sa biktima ug matudlo kung kini ba ang suspetsado ug dihang positibo kining gitudlo sa 7-anyos nga biktima, deretso kining gibalhog sa prisuhan tungod kay sayod sila nga daghan ang nasuko niini sa dapit.
Gipasabot usab ni Mulat nga kung anaa na sa ilang kostudya ang suspetsado, dili na kini
pwedeng makagawas, hinungdan wala gayud kamatouran ang report nga gipadagan-dagan kining hubo diha sa plaza sa Tagoloan.
Si Jaguar giakusahan nga maoy milugos sa 7-anyos nga batang babae dihang giguyod niini ang biktima kuyog ang 8-anyos nga higala niini apan swerteng nakalingkawas ang 8-anyos.
Ang 7-anyos maoy napahimungtan sa suspetsado, hinungdan sa kadaot nga naangkon niini sa lawas partikular sa pribadong parte sa lawas niini.
Giklaro usab ni Mulat nga walay kamatouran usab ang report nga namatay ang biktima pila ka adlaw gikan sa pagpanglugos.
"Dili kana tinoud ug sa pagkakaron nagpaalim pa ang biktima. Gani amo pa gihatdan og tambal para mapadali iyang pagkauli," butyag ni Mulat.
Sa pagkakaron, ang suspetsado sa pagpanglugos gidala na sa Misamis Oriental Provincial Jail ug pormal na nga napasakaan og kasong rape, attempted rape ug child abuse.
Gipatik sa mantalaang SuperBalita Cagayan de Oro Nobiembre 30, 2015.
Linkback:
https://tubagbohol.mikeligalig.com/index.php?topic=81515.0
