SuperBalita Cagayan de Oro
Ni Stephanie Viovicente-Berganio
Sunday, October 6, 2013
PATAY ang usa ka sundalo human giluba sa wala mailang lalaki niadtong nilabayng adlaw sa Barangay Poblacion, lungsod sa Initao, Misamis Oriental.
Giila ang biktima nga mao si Private First Class Beryl Martin, 29, minyo, lumad nga taga siyudad sa Pagadian ug sakop sa 36th Infantry Battalion sa Philippine Army.
Si Martin dayo lamang sa maong dapit tungod kay buot mag ninong sa anak sa usa ka higala.
Sa inisyal nga imbestigasyon nasuta nga igo lamang nga nagtan-aw sa natigayon nga disko sa maong dapit ang biktima apan sa pagpauli niini kalit lang kining giluba sa wala mailang lalaki.
Si Police Superintendent Roy Montes, hepe sa Initao Police Station, namahayag nga padayon pa nilang gisuta ang motibo sa pagpangluba ning panahona.
Ila usab gilantaw ang anggulong love triangle tungod kay daw sa wala pa nahitabo ang insidente giingong aduna kini gikahinabi nga usa ka babaye nga napuyo sa lungsod usab sa Naawan, Misamis Oriental.
Ang higala sa biktima niingon nga bag-o lang sa dapit si Martin ug wala kini kaaway. Dako sab ang pagduda niining’ gitripan ang higala.
Ang sundalo, kinsa nakaangkon og samad dinunggaban sa iyang dughan nga bahin, gisuwayan pa og dala sa Northern Mindanao Medical Center ning siyudad sa Cagayan de Oro apan nakabsan sa kinabuhi sulod sa emergency room.
Linkback:
https://tubagbohol.mikeligalig.com/index.php?topic=76046.0
