NILUBONG ang bala kilid sa apapangig sa usa ka lalaki human nagpusil sa kaugalingon niadtong Biyernes atol sa adlaw sa Pasko sa Manticao, Misamis Oriental.
Talandugon ang kahimtang sa biktima nga si Jhonny Javier, 22, adunay kaipon ug lumulupyo sa nahisgutang dapit.
Sa impormasiyon gikan sa Northern Mindanao Medical Center, Cagayan de Oro City, nga depresiyon ang hinungdan sa pagsulay sa biktima sa iyang paghunos sa kaugalingon.
Giingong nakamata na lamang ang kaipon nga si Enjay sa nadunggan nga buto sa armas ug nasutang ang iyang kaipon ang nagpusil sa kaugalingon diha mismo sa iyang baba.
Nakurat ang kaipon gumikan kay wala man kini kasayoran nga aduna diay armas ang biktima.
Nakaangkon ang biktima og samad sa iyang baba ug nilubong pa ang bala sa iyang apapangig hinungdan nga wala kini panimoot sa dihang gidala sa tambalanan.
Nasayran nga mibutyag kini nga gumikan kay nawad-an an na kini og paglaom kay lage on-and-off man ang trabaho niini isip construction worker.
Sa pagsulat niini nga balita pabilin pa nga giobserbahan sa mga mananambal ang biktima sulod sa ospital. (KCS)
Gipatik sa mantalaang Superbalita Cagayan de Oro Disyembre 27, 2015.
Linkback:
https://tubagbohol.mikeligalig.com/index.php?topic=81608.0
