Ni KRIS C. SIALANA
PADAYON pa nga nagpaalim sa Northern Mindanao Medical Center (NMMC) ang usa ka lalaki human gibangga niini ang ulo sa poste niadtong Sabado, alas 11:00 sa gabii diha sa Piaping, Puti, Macabalan, ning dakbayan sa Cagayan de Oro.
Nilanding sa nahisgutang balay tambalanan si Jerome Bria, 45, minyo ug lumulupyo usab sa nahisgutang dapit.
Sa nahipos nga report gikan sa NMMC, diin gidala ang biktima, gikabutyag nga lango kini sa ilimnong makahubog sa dihang pauli na sa ilang panimalay.
Gikabutyag nga gumikan sa kahubog niini, gibangga niini mismo ang ulo sa poste sa ilang gate.
Nakaangkon ang biktima og samad sa iyang ulo, ilabi na sa iyang agtang gumikan na usab sa pagsungag niini sa maong poste.
Sa pagsulat niini nga balita, pabilin pa nga nagpaalim sa nahisgutang balay tambalanan ang biktima.
Gipatik sa mantalaang Superbalita Cagayan de Oro Hulyo 11, 2016.
Linkback:
https://tubagbohol.mikeligalig.com/index.php?topic=82489.0