MikeLigalig.com

Ni Angeline Valencia/EIM (Banat) Updated August 28, 2011 12:00 AM


TAGBILARAN CITY, Philippines – Usa ka Sugbuanon ang nadakpan sa usa ka checkpoint sa kapolisan diha sa Mansasa-Bool junction human makuhai og tulo ka plastic packs nga gidudahang shabu. Ang nadakpan mao si Shebuel Calamba nga lumad nga taga dakbayan sa Lapulapu dihang kini nadakpan sa grupo ni Insp. Antonio Samante niadtong Huwebes sa hapon samtang ang suspek luwan og motorsiklo.

Ang pagkasikop sa suspek giingong nagpamatuod nga gikan sa Sugbu ang mga shabu sa lalawigan sa Bohol . Nakuha gikan kang Calamba ang 0.11 grams ug napasakaan na og kaso sa piskalya.

Sumala pa nga ang suspek nagkurog dihang gipara sa kapolisan hinungdan nga ilaha kining gipangitaan og dokumento sa iyang motorsiklo. Gikatahong dunay nasigpatan si Samante nga gamay’ng bulsita sa kamot sa suspek ug dihang gitan-aw mikisi-kisi kini ug nabuhian ang gikuptan sa suspek dayong dagan.

Ang mga polis daling migukod kaniya ug kini nakuptan ug gitawag sila si barangay kagawad Gerardo Inting ug Carolino Pahang ug usa ka representante sa hukmanan nga si Zacarias Castro isip mga testigo.

Gawas sa tulo ka cellophane sachets nga may gidudahang shabu laing basiyo sa pakete, cellphone, disposable lighter, ug cash nga P140 ang nakuha kang Calamba. Gikumpiskar og apil ang iyang Honda XRM motorcycle nga may plakang 7882GH.

Sa laing bahin, usa gihapon nga gidudahang drug suspect ang nadakpan sa kapolisan atol sa buybust operations sa lungsod sa Bilar sa mga sakop sa Provincial Public Safety Company niadtong Miyerkules.

Ang nadakpan mao si Jessie Sumampong kinsa nakuhaan og 0.06 gramos nga shabu sa kapolisan. Si PO2 Rolex Tamara, mibutyag nga ila nang napasakaan og kaso ang suspek.

Si Sumampong nadakpan human motunol og duha ka paketeng shabu sa poseur buyer ginamit ang marked money sa mga polis. Uban sa maong operasyon ang Bilar Police Station pinangulohan ni Insp. Ricardo Tero. (BANATNEWS)



Linkback: https://tubagbohol.mikeligalig.com/index.php?topic=43186.0