NABULIT sa samad dinunggaban ang lawas sa usa ka lalaki nga napalgang wa nay kinabuhi sud sa usa ka lodging house, alas 7:13 sa buntag, Huwebes didto sa Barangay Apokon.
Ang biktima nailhan nga si Fhiel Lamisajan, 31, molupyo sa Purok 4, Barangay Anislagan, Nabunturan, Compostela Valley Province.
Subay sa imbestigasyon nila PO2 Lemuel Dalman ug SPO1 Brigido Lagula Jr., sakop sa Tagum City Police Station, masayran nga si Lamisajan mi-check-in sa Drive Tru Inn, sa National Road, Barangay Apokon, Tagum City alas diyes sa gabii, Miyerkules.
Dugang pa nga kauban ni Lamisajan sa pagsud sa Inn ang usa ka lalaki nga wala mailhi.
Apan paglabay sa 45 minutos, migawas ang kaubang lalaki sa biktima, wa na kini mibalik.
Pagka-buntag, ang kahera sa maong establistamento nga si Jenalyn Abrogar ang nakadiskubre sa patayng lawas sa biktima nga nagbuy-od sud sa comfort room sa Room 10 sa maong inn.
Nakuratan sa iyang nakita, nagpakitabang si Abrogar sa kapulisan alas 7:50 sa buntag, Huwebes.
Sa paghiling sa otoridad sa crime scene, nakuha nila ang unom ka pakete nga shabu, drug paraphernalia, kwarta nga mokabat P4,112, drivers license sa biktima ug ubang personal nga gamit niini.
Mga narekober sa otoridad nga druga gipadala sa PNP Crime laboratory, samtang ang patay'ng lawas sa biktima gipahimutang sa Topaz Funeral Homes.
Nagpadayon ang otoridad sa pagsusi sa hitabo, lakip na pag-ila sa lalaking naka-uban sa biktima una siya nakit-ang patay. (Teddy Cabana)
Gipatik sa mantalaang SuperBalita Davao Oktubre 13, 2012.
Linkback:
https://tubagbohol.mikeligalig.com/index.php?topic=55852.0
