MikeLigalig.com

Ni Wen Celen (Banat) Updated July 04, 2011 12:00 AM


CEBU, Philippines - Wala malipay si Kongresista Tomas Osmeña sa habagatang distrito sa dakbayan sa Sugbo sa state of the city address (SOCA) ni Mayor Michael Rama niadtong Biyernes kay matud pa niya pulos lang sulti ug pagpangita og sayop ang gihimo sa naulahi.

Matud pa niya nga naglagot siya kay ang gipagarpar ni Rama mao ra gyud ang mga nahimo niini   sa iyang administrasyon karon ug nakalimtan ang iyang (Osmeña) mga nahimo.

Gisukit kun ang kapakyas niya sa pagtambong sa SOCA ni Rama iya bang gituyo, si Osmeña nagkanayon nga sila ug ang iyang kapikas nga si Konsehal Margot Osmeña mitambong sa lubong ni Ramon Vargas Jr. manghod ni Margot didto sa Manila niadtong Biyernes nga maoy hinungdan sa iyang kapakyas pagpaminaw sa SOCA sa mayor.

Naglagot si Osmeña kay alang kaniya napahimuslan ni Rama karon ang mga kalamposan niya (Osmeña) sa iya pang administrasyon apan wala gyud kini hisgoti   sa nahauna.

Pipila sa mga kalamposan ni Osmeña mao ang mga paglapad sa mga karsada niadtong siya pay mayor sa dakbayan sa Sugbo uban sa pagpangaspalto niini.

Miingon siya nga wala gani makapasalamat si Rama kaniya sa iyang pagpalapad ug pagpaaspalto sa dalan V. Rama, sa kadungganan sa amahan ni mayor.

Si Rama sa iyang SOCA nakadawat og masipang pakpak sulod sa 80 ka higayon gikan sa gibana-banang mga 10,000 ka mga nanambong.

Makadaghan niya balikbalika ang pagpasalamat sa mga miyembro sa konseho sa dakbayan sa Sugbo uban kang Vice Mayor Augustus Young nga maoy presiding officer.

Apan wala kini makapasalamat kang Osmeña nga kanhi iyang suod apan nahimo niya karong kaaway sa politika ilabi na ning higayong mibiya na siya gikan sa BOPK nga gipangunahan ni Osmeña.

Gisuwayan nato og kontak si Rama aron susihon kun gituyo ba niya ang paghikalimot kang Osmeña o kaha kalagot ug kapungot batok sa kanhi mayor ang diha sa iyang dughan niadtong pag-SOCA niya apan wala nato kini mahinabi.  (BANAT NEWS)



Linkback: https://tubagbohol.mikeligalig.com/index.php?topic=42054.0