Ni Lesley Caminade-Vestil (Banat) Updated December 12, 2011 12:00 AM
CEBU, Philippines - Namatay dihadiha ang usa ka lalaki human kini paulani og mga bala samtang naglakaw sa karsada sa dalan Gil Tudtud, sa barangay Mabolo , dakbayan sa Sugbo sa miaging tungang gabii. Ang biktima nailhan nga si Jose Bersabal, 58, nagpuyo sa Joaquin Street sa nahisgutang barangay.
Sa pasiunang imbestigasyon sa kapolisan nasayran nga ang biktima migawas sa ilang balay kay buot untang mopalit og sigarilyo sa silingang tindahan.
Apan sa kalit gisugat kini og duha ka wala hiihing tawo kinsa walay pupangutana nga mipauwan sa biktima og mga bala.
Ang mga samad niini sa ulo, dughan ug nagkalainlaing bahin sa lawas maoy nakahunos diha-diha dayon sa iyang kinabuhi.
Human makita sa mga kriminal nga nahagba na sa yuta ang biktima nga naglunang sa iyang kaugalingong dugo, dali kaayong mipahilayo sa maong dapit.
Gisubay pa sa kapolisan ang hinungdan sa maong pagpamusil samtang padayon usab nilang gipangita ang mga kriminal. (BANAT NEWS)
Linkback:
https://tubagbohol.mikeligalig.com/index.php?topic=44751.0
