Ni Guam P. Logroño
Saturday, September 3, 2011
THIRD degree burns ang naangkon sa usa ka lalake samtang usa usab ang natunok sa bildo sa sunog sa Sitio Kasagingan, Banawa, Barangay Guadalupe, dakbayan sa Sugbo diin 30 ka mga balay ang nangaugdaw kagahapon sa buntag.
Ang sunog nagagikan sa balay ni Victor Pantonial, 47, nga way tawo kay siya nagtrabaho sa Guadalupe samtang ang iyang asawa nga si Era dunay gilakaw.
Si Vincent Mañego, gibabanang 40 anyos , manghimoay og sapatos, nakaangkog 3rd degree burns sa iyang kalawasan human nibalik pagsulod sa ilang balay aron unta sa pagsalbar sa ubang mga butang.
Nalandig na hinuon siya sa Cebu City Medical Center (CCMC) tungod sa iyang grabeng mga paso.
Laing naangol giilang si Nestor Rey Delos Arcos, 23, kinsa samdan sa iyang walang tiil human gituohan nga nasamad sa bildo sa ilang balay dihang nagdali-dali sila sa pagpanghakot sa mga butang.
Si Sr. Supt. Aderson Comar, hepe sa Cebu City fire department nga nahinabi sa Sun.Star Superbalita, nagkanayon nga ilang giisa ngadto sa Task Force Alpha ang sunog nga nakontrolar sa paglabay sa 26 minutos.
Matod niya nga mokabat sa P300,000 ang initial nga pagbana-bana sa danyos sa sunog nga ni-ugdaw sa 30 ka mga balay nga ginama lang sa mixed ug light materials.
Gipasabot niya nga giisa niya sa Task Force Alpha aron ang makaandam sila sa pagpangayog support sa ubang mga fire station sa mga silingang lugar kon ugaling modako gyud ang kayo.
Mapasalamaton siya kay wa molanat og dugay ang ilang pagbugno sa kayo samtang ang tanang mga bombero sa siyam ka fire stations sa dakbayan sa Sugbo nakarespondi gilayon uban sa mga sakop sa Chinese volunteer, Emergency Unit Foundation (ERUF), mga barangay fire brigade, kapulisan ug uban pa.
Giangkon niya nga nasaag ang ubang mga fire truck tungod kay sayop ang unang impormasyon nga ilang nadawat sa insaktong location sa lugar kon asa moagi.
Nasuta nila nga mas madali silang makalusot kon moagi sa may Modesta Village sa Guadalupe, apan bisan pa man niini mga tres minutos una niabot ang ilang first responder sa Guadalupe, ingon man sa Labangon.
Ang mga hose ilang gisumpaysumpay aron makaabot sa interior nga portion sa kabalayan nga sagad mga light material hinungdan nga naglisod gyud sila samtang ang kayo paspas nga niulbo.
Wa pa madeterminar sa mga imbestigador sa Cebu City Fire Department kon unsay hinungdan sa sunog.
Mga silingan didto sa lugar nibutyag nga kuryente maoy hinungdan sa sunog tungod kay dunay mga gamit sa balay nga wa mapawong.
Si Euber Carredo, 38, nga nahinabi sa Sun.Star Superbalita, nagkanayon nga nanglaba siya niadtong higayuna samtang ang iyang anak nagluto dihang kalit lang nisinggit ang iyang mga silingan nga sunog.
Naluwas hinuon niya ang iyang tanang mga anak ingon man walay naangol kanila apan pipila nalang nila ka mga butang ang nangasalbar tungod sa ka kalit sa insidente. --
Gipatik sa mantalaang SuperBalita Cebu Septembre 04, 2011. Linkback:
https://tubagbohol.mikeligalig.com/index.php?topic=43313.0
