By Romeo T. Limpangog/EIM (Banat) Updated May 01, 2011 12:00 AM
CEBU, Philippines - Gimando ni Senior Superintendent Noel Gillamac, direktor sa Mandaue City Police Office (MCPO) ang lawom nga imbestigasyon sa nahitabong paglungkab sa buhatan sa Department of Interior and Local Government (DILG) nga misakiyo sa kapin P70,000 nga kantidad sa mga mahalong butang sa maong buhatan.
Kini maoy nadugang sa laing imbestigasyon sa pagpanglungkab sa JW Auto LPG Corporation nga mokabat usab sa P300,000 nga salapi ang nasakiyo sa k******n.
Si SPO2 Marcos Noval sa Investigation Detection and Management Bureau (IDMB) miingon nga base sa ilang imbestigasyon nahanaw ang LCD Flat Screen Monitor ug usa ka CPU sa computer sa maong buhatan.
Ang pagpanglungkab unang nadiskubrehan sa usa ka news boy kinsa alas-6 sa buntag sa maong adlaw nga naghatod og newspaper sa maong buhatan.
Si Danilo Famador usa sa mga kawani sa DILG miingon nga naulahi kini sa paggawas sa buhatan sa miaging hapon tungod kay aduna siyay giandam nga importanteng dokumento ug gipaniguro nga nakandaduhan gyud niini ang pultahan sa iyang pagbiya.
Samtang giimbestigar karon ang mga gwardiya nga sila si William Abrio, Ritche Espihon ug Abraham Sanoria kalabot sa maong lungkab. (BANATNEWS)
Linkback:
https://tubagbohol.mikeligalig.com/index.php?topic=40454.0
