Monday, April 25, 2011
PULOS mitugpa sa Davao del Sur Provincial Hospital ang magsuong lalaki sa dihang nagtinigbasay human nga nangahubog.
Ang insidente nahitabo didto sa Purok 3, Barangay Palili, Padada, Davao del Sur, banda alas 4 sa hapon niadtong Dominggo.
Sila si Jerry, 32, ug Joel Paradero, 26, pulos minyo, gihulagway nga unang nagtagay sa ilimnong makahubog sud mismo sa balay sa ilang inahan.
Si Joel, lumolupyo sa Purok 5, Barangay Kasuga, sakop sa lungsod sa Magsaysay, Davao del Sur, niduaw matud pa niadtong higayona sa iyang inahan ilabi pa kay gisaulog Dominggo sa Pagkabanhaw ni Ginoong Hesukristo.
Apan wa kini magdahom nga magkalalis sila sa iyang maguwang ug misangko sa madugoong insidente.
Wa hinoon gibutyag sa taho kon kinsa kanila ang niuna pagkuha og mahait nga sundang, apan gihulagway nga si Jerry nasamdan sa ulo samtang si Joel naigo sab sa tuong bahin sa kamot hinungdan nga gidala sila sa balay tambalanan.
Si Police Officer 1 Glenndel Susas nihimo na sa makuting imbestigasyon samtang ang magsuon giatiman pa ni Dr. Gerardo Hernadez sud sa tambalanan.
Gisubay sab sa kapulisan kon unsay gilalisan sa duha nga nisangko sa pagtinigbasay. (Orlando Dinoy)
Gipatik sa mantalaang SuperBalita Davao Abril 26, 2011. Linkback:
https://tubagbohol.mikeligalig.com/index.php?topic=40398.0
