SuperBalita Cagayan de Oro
Ni Kris C. Sialana
Wednesday, September 10, 2014
PATAY ang usa ka sekyu human giingong gipusil sa kainom niini adlaw nga Martes mga alas 11:30 sa gabii sa Zone-8, Bulua ning siyudad sa Cagayan de Oro.
Ang biktima naila nga mao si Concordio Laga, 28, usa ka security guard ug residente sa 265-Matilde Neri Street, Barangay Carmen ning siyudad.
Gitumbok nga suspetsado ang usa ka Rodel Paclar, 40, ulitawo nga residente sa susamang dapit.
Sa insiyal nga imbestigasyon sa Police Station 7 (PS7) sa Bulua nasayran nga sa wala pa nahitabo ang pagpamusil nag-inom kining biktima uban sa laing duha ka mga lalaki.
Sumala sa nakasaksi nga kalit lang gipusil ni Paclar ang biktima hinungdan sa samad nga naangkon niini sa tuo nga bahin sa ulo nga gituohang maoy hinungdan sa iyang kamatayon.
Nakuha gikan sa crime scene ang usa ka botelya sa ilimnong makahubog ug usa ka basiyo sa bala sa kalibre .38 nga armas.
Linkback:
https://tubagbohol.mikeligalig.com/index.php?topic=78962.0
