Ni Darrel A. Carumba & Romeo Limpangog (Banat) | Updated June 17, 2013 - 12:00am
CEBU, Philippines - Gipusil patay ang usa ka construction worker samtang nagtuman sa sugo sa lawas didto sa kalibunan sa Sityo Cadastral sa barangay Looc siyudad sa Danao kagahapon sa mga alas 2:30 sa sayong kaadlawon.
Ang biktima nga nakaangkon og samad pinusilan sa dughan nga nilapos ang bala sa bukobuko patay na nga nadangat sa Danao District Hospital sa maong siyudad giila nga si Sonny Hermocilla, 22.
Wala pa matumbok sa kapolisan kun kinsa ang mamumuno niini, apan kagahapon sa sayo sa buntag ang asawa sa biktima nga si Anna Marie Hermocilla, mipatin-aw sa buhatan sa kapulisan ug nitumbok sa usa ka ginganlan og Benjie, nagpuyo usab sa maong lugar nga gipasanginlan niini nga responsable sa krimen.
Matud ni PO2 John Benci sa Danao City Police dihang nahinabi sa Banat News migawas sa ilang panimalay ang biktima aron magtuman sa sugo sa lawas nianang kaadlawon ug misum-ok kini sa kalibunan.
Nadunggan na lang sa asawa sa biktima ang buto sa armas ug wala na mobalik pa ang iyang bana maong iyaha kining gisundan ug gipangita ug nakita nalang niya kini nga nagbuy-od na sa maong lugar.
Adunay samad pinusilan sa iyang ubos nga bahin sa walang dughan ug ang bala milapos sa bukobuko niini. Gisuwayan pa unta kini og hatud sa Danao City District Hospital apan gideklarar na kini sa mga doktor nga patay na.
Gisubay karon sa kapolisan ang pagkatawo sa ginganlan sa asawa sa biktima ug kung unsay kalambigitan niini sa maong krimen. (BANAT NEWS)
Linkback:
https://tubagbohol.mikeligalig.com/index.php?topic=73445.0
