By RMN Radio
SARANGANI PROVINCE MAGSAULOG KARONG ADLAWA SA IKA-27 NGA FOUNDATION ANNIVERSARY
Ensakto baynte-syete (27) katuig karong adlawa ang kasumaran sa pagkamugna sa probinsya sa Sarangani human sa pagkahimulag niini sa South Cotabato. November 28, 1992 mao ang petsa kung diin unang nakaangkon og ginatawag nga “corporate existence” ang Provincial Government sa Sarangani pinaagi sa pagkapili sa unang mga provincial official gipangunahan kaniadto nila the late Congressman James Chiongbian ug the late Gobernadora Priscilla Chiongbian, mga apuhan ni Governor Steve Chiongbian Solon.
March 16, 1992 na-aprobahan ni Presidente Ferdinand Marcos ang balaod nga gipanday ni Congressman Chiongbian, ang Republic Act No. 7228 nga nagmugna sa Sarangani, adunay plebisito nga nahitabo ug pagka-Nobyembre nilingkod ang first set of provincial officials.
Lauman nga bisita karong adlawa sa anniversary program dungan sa selebrasyon usab sa ika-17 nga MunaTo Festival matigayon sa dakong stage nga gimuntar atubangan sa Kapitolyo sa Sarangani, ang pride sa Sarangani Province ug sa tibuok Pilipinas nga si Senador Manny “Pacman” Pacquiao, kuyog niini ang iyang igsoon nga si Congressman Ruel Pacquiao.
Pagasugdan alas singko sa kadlawon (5am) karong adlawa ang MunaTo Fun Run, ug musunod gayud dayon ang parada ug ang Employees Day sa tanang government workers sa probinsya ug sa pito (7) ka munisipyo. Pormal usab ablihan karong adlawa ang Municipal Village makita ang mga produkto ug destinasyon sa mga lungsod sa Sarangani, Craft Conference, Exhibition and Cultural Presentation sa mga kaigsoonang lumad ug Muslim, Sarangani Wildlife Museum sa ECPC, ug ang Flowerhorn and Beta Show Competition makita ang display sa nindot nga mga isda.
Karon pud mahitabo ang MunaTo Photo Contest paindigay sa nindot mukuha og mga larawan, Kulay Sarangan: Mural Showcase makita sa lobby sa Kapitolyo ang nindot nga mga gipinta nagpakita sa katahum sa Sarangani ug sa mga nanimuyo niini, ang tinuig pud nga Transport Summit alang sa transport sector, ug ang pagsugod sa MunaTo Youth Festival, may pa-boxing pa sulod sa Capitol Grounds.
Kagabii, daw mabungog ang Sarangani Capitol Gymnasium sa kadaghan sa mga tao nga nihatag og pagsuporta sa mga magdudula sa MPBL kon Maharlika Pilipinas Basketball League, hilabi na ngadto sa Sarangani Marlins. Sa walay pabor-pabor, nidaog ang Sarangani Marlins batok sa Quezon City sa score nga 78-74, upat (4) ka pontos lang ang lamang sa Sarangani.
Kulbahinam ang matag minuto sa maong pagdula tungod dikit ang mga score. Gideklara nga best player of the game si Pari Llagas sa Sarangani Marlins. Dako na lamang ang pagpasalamat ni Coach Tumapat. Walay nakitang rason si Tumapat kundili ang homecourt ug homecrowd advantage tungod nakita sa mga basketball player sa Sarangani Marlins nga naghugyaw ang ilang mga kababayan sa Sarangani Province alang sa ilang kadaugan.
Daghan ang nakadayig sa bag-ong dagway sa Sarangani Capitol Gymnasium, hilabi na ang flooring nga sinaw ug pabor sa mga padula sa MPBL, PBA ug uban pang tournament.
Apan mas labing gikalipay sa libuan ka mga tao nga nipuno sa Capitol Gym kagabii ang presensya mismo nila Senador Manny Pacquiao ug Governor Solon nga personal nisaksi ug ni-ayuda sa duha (2) ka padula sa MPBL, kauban ang mga board member, ug mga municipal-barangay official, sa pagsuporta nila Congressman Ruel Pacquiao ug Vice Governor Elmer De Peralta.
* Today's Helpful Tip *
Tala app is a fast and easy way to borrow money, and it's used and trusted by many. Download Tala to join millions of Filipino users today! >>>
http://inv.re/9o3vpLinkback:
https://tubagbohol.mikeligalig.com/index.php?topic=91602.0
