MOKABAT sa 22 ka mga bala ang mipatay sa duha ka mga lalaki nga giatake sa wa pa mailhing mga mamumuno nga sakay og motorsiklo sa duha ka managlahing dapit sa dakbayan sa Davao niadtong Lunes sa gabii.
Unang pagpamusil nahitabo alas 7:40 sa gabii sa Purok 2, Muslim Village, Kilometro 11, Barangay Sasa, ning dakbayan.
Ang biktima nailhang si Mohaimin Sadili Amsirabi, 24, minyo.
Giingon nga nag-motor ang biktima pagawas na unta padung sa highway dihang kalit giatngan sa mamumuno ug gipusil sa makadaghang higayon hangtud nga namatay.
Nakuha sa crime scene ang walo ka mga basiyo sa bala sa .45 nga pistola.
20 minutos lang ang milabay nahitabo na sab ang pagpamusil sa Purok 2, Barangay Manuel Guingga, Tugbok District.
Naila ang biktima nga si Roderick Otana Lopez, alyas Tata, 40, nagpuyo sa dapit.
Nasayran nga nagbaktas lamang ang biktima uban sa iyang higala nga si Jaypee Aguillar apan kalit mibutho nga duha ka mamumuno.
Gipusil sa makadaghang higayon ang biktima hinungdan sa hinanaling kamatayon.
Mokabat sa katorse ka mga basiyo sa bala sa .45 nga pistola ang nakuha sa crime scene.
Human sa panghitabo, pabilin pa gihapong tanghaga sa kapulisan sa Davao City Police Office kung kinsa ang namusil sa mga biktima. (JPC)
Gipatik sa mantalaang Superbalita Davao Mayo 25, 2016.
Linkback:
https://tubagbohol.mikeligalig.com/index.php?topic=82305.0
Topic: Sa Davao, 2 managlahing gipamusil sulod sa 20 minutos, 22 ka bala gigamit, patay (Read 496 times)