Ni EDGARDO FUERZAS
COTABATO CITY -- Gimandoan ni Governor Esmael "Toto" Mangudadatu ang kapulisan sa pag-imbestigar sa pagpanglugos, pagtigbas ug pagsunog sa 18-anyos nga babaye didto sa Datu Paglas, Maguindanao niadtong Septyembre 5.
Giila ang biktima nga si Bainor Solaiman ug molupyo sa Datu Paglas, Maguindanao Province.
Mahinumdoman nga nakadawat og taho ang Buluan Municipal Police Station kalabot sa nasunog nga canteen didto sa Mahad National High School, nga nahimutang sa utlanan sa Buluan ug Datu Paglas.
Sa dihang gisusi sa Bureau of Fire Protection (BFP) ang sunog, nakit-an sa mga bombero ang patayng' lawas sa dalaga nga gilamoy sa kalayo.
Si Solaiman usa ka working student sa Mahad National High School ug nag-inusara lang nga natulog niadtong mga panahona.
Sa inisyal nga imbestigasyon sa kapulisan, nasayrang' gitigbas patay ang dalaga sa mga wala pa mailhing mga suspetsado ug dayon gisunog ang canteen.
Duna say dugang balita nga tulo ka mga tawo ang nakit-ang milugos kang Solaiman sa wala pa masunog ang canteen.
Gikanayon ni Buluan Municipal Police Chief Victorino Panchoy nga padayon pa ang ilang imbestigasyon sa maong hitabo, ning pagbalita.
Gipatutukan sab ni Mangudadatu ang imbestigasyon sa kamatayon sa dalaga aron madakpan ang mga suspetsado.
Gipatik sa mantalaang SuperBalita Davao Septembre 13, 2015.
Linkback:
https://tubagbohol.mikeligalig.com/index.php?topic=80963.0
