Ni Sheila C. Gravinez
Monday, July 18, 2011
NAGHILAK ug nagkisi-kisi pa ang bag-ong gihimugso nga batang babaye dihang gihagbong sa sapa sa wa mailhing lalaki sa Barangay Pangdan sa syudad sa Naga alas 11:30 kagahapon sa buntag.
Si Guadalupe Villejo nga nagpuyo duol sa sapa, maoy nakakita sa bata nga gihagbong sa usa ka hamtong nga lalake gikan sa ibabaw sa taytayan tumong ngadto sa nagpundok nga mga bato sa tunga-tunga sa sapa.
Matod niya nanikop siya og isda niadtong higayona, dihang iyang nakit-an ang lalaki nga padung molabay og usa ka plastic bag nga iyang gibuyag ug gipangutana kon hugaw ba sa tawo ang ilabay niini sa sapa.
“Hoy, unsa na imong ilabay, tae na sa tawo? Ipakaon na nako nimo ron,†asoy ni Villejo dihang gihinabi sa mga tigbalita.
Apan igo lang siya gitubag sa lalaki nga, “Nay, padaplin kay naa koy ilabay.â€
Tungod sa kakusog sa impact sa paghagbong, nalubyok ang ulo sa masuso nga gidudahan nga maoy nakaingon sa kamatayon niini.
Si Villejo nihulagway sa masuso nga giputos og tualya nga kolor orange nga gisulod sa usa ka plastic bag diin nagbitay pa ang pusod niini uban sa inunlan.
Iyang giasoy nga nakurat siya dihang iyang nakit-an nga bata diay ang sulod sa plastic bag, nakahilak siya tungod sa kaluoy ug wa niya kini gibutang sa yuta sa kahadlok nga kan-on kini sa iro.
“Sos, luoy kaayo ang bata. Kung niingon pa siya nga imo na ni bisan pobre mi ako to dawaton oi! Ang uban gani gusto magka-anak, sila nuon ilang gilabay, Kaluoy gyud sa bata,†dugang pahayag ni Villejo kinsa usa usab ka inahan.
Ang lalaki nga naghagbong sa bag-ong gihimugso nga bata gibanabanang nagpanuigon og kapin sa 50-anyos samtang ang kauban niini’ng babaye wa na maklaro ni Villejo sanglit nagtakilid kini.
Human sa paghagbong sa puya, ang duha ka mga responsabli daling misakay sa usa ka pribadong multicab nga color puti ug berde ug mipabulhot balik sa Poblacion, Naga.
Ang bata gipahimo-an ni Naga City Mayor Valdemar Chiong og gamay nga lungon ug gibunyagan sa pangan nga Angel Rose sa wala pa gilubong sa publikong sam-ang sa syudad.
Si Chiong nagtuo nga dili taga Naga ang naglabay sa bata tungod kay way nakaila niini diha sa maong lugar.
Iyang gimando-an ang kapulisan sa dakbayan nga imbestigahon kini aron masilotan ang mga ginikanan nga way kaluoy nga milabay sa inosenteng anghel.
“Sos kung dili man gani sila makabuhi, maayo pa gipasagop na lang,†padayag ni Chiong.
Gipatik sa mantalaang SuperBalita Cebu Hulyo 19, 2011. Linkback:
https://tubagbohol.mikeligalig.com/index.php?topic=42361.0
