Ni JEEPY P. COMPIO
TUNGOD wala gitagad ang anak nga pasyente, usa ka amahan ang way kahadlok nga midunggab sa doktor ug nurse sa Southern Philippines Medical Center gamit ang syringe [injection] alas 2:30 sa hapon niadtong Martes.
Ang biktimang doktor giilang si Donna Jean Pojol Subaldo, doctor clerk sa Emergency Room sa Trauma Surgery Department Station, samtang ang nurse mao si Lea Pauya Elica, Auxiliary Nurse sa ER Section.
Sa inisyal nga imbestigasyon ni Senior Police Officer 2 (SPO2) Abelardo Manubag, imbestigador sa Buhangin Police Section, nasayran nga ang doktor ug nurse okupado sa pag-atiman sa ubang pasyente nga unang miabot sa emergency room.
Giingong miduol sa doktor ug nurse ang suspek nga si Jesus Dayondon Manalo, 41, minyo, laborer, nagpuyo sa Purok 2, Gravahan, Barangay Matina Crossing tungod gusto niining unahon og atiman ang iyang 9-anyos nga anak nga dunay daghang samad ug bun-og sa kalawasan human nabanggaan.
Sa pag-atubang sa amahan nga mihangyo sa doktor ug nurse, giingong wa kini natagad dayon maong nasuko ug mikuha og injection nga iyang nakita sa la mesa sa doktor.
Sa iyang kalagot, kalit niyang giduslak ang syringe nga dunay dako nga dagom sa liog sa doktor ug nurse hinungdan nga nataop ang syringe.
Dali dayong gisikop si Manalo sa mga sekyu sa maong ospital ug gidala ug gipaslak sa prisohan.
Gipatik sa mantalaang Superbalita Davao Enero 07, 2016.
Linkback:
https://tubagbohol.mikeligalig.com/index.php?topic=81660.0
