Ni Stephanie Viovicente-Berganio
SuperBalita Cagayan de Oro
Tuesday, July 2, 2013
GIBUTANG na lamang sa daplin sa dalan ang patay nga anaa na sulod sa lungon human miulbo ang sunog sa 2nd floor nga bahin sa usa ka punerarya nga nahimong sa Rizal-Gomez St., siyudad sa Cagayan de Oro.
Nagsugod ang kalayo sa 2nd floor nga bahin sa Somo funeral homes mga alas 1:30 sa hapon nga miabot pa sa 30 minutos ang pakigbugno sa mga bombero gikan sa Bureau of Fire Protection ug lain-laing fire volunteers.
Gibutyag ni City Fire Marshal Shirley Teleron nga dili pa nila masuta kung unsa ang hinungdan sa pag-ulbo, apan usa sa ilang giimbestigahan mao ang giingong nabiyaan nga niluto. Gibana-bana adunay damyos nga P300,000 ang maong sunog.
Apil sa nasunog mao ang mortuary sa maong punerarya ug samtang adunay usa ka patay nga gisulod na sa lungon ug kamulo gihaya gibalhin an lamang kini sa daplin sa dalan sa mga hingtungdan niini.
Gikataho nga ang maong punerarya gitukod tuig 1950 nga orihinal nga gipanay-iyanan ni Ciriaco Somo ug kasamtangan nga gidumla sa anak niining si Jenny.
Gikagubtan usab pag-ayo nga daw adunay na-trapped nga tawo sa sulod apan gihimakak kini ni Teleron ug miingon nga sa ilang pagsusi sa area, wala silay nakita nga lawas sa tawo. Sa paspas nga pagresponde sa mga bomber, wala na mikaylap pa ang kalayo sa kasikbit nga mga establismento.
Hangyo lamang ni Teleron sa mga residente nga unta magbinantayon pag-abot sa pagluto ug dili kini basta bastang mobiya sa mga puloy-anan.
Linkback:
https://tubagbohol.mikeligalig.com/index.php?topic=73677.0
