Ni Stephanie Viovicente-Berganio
Sun Star
GIHIMAKAK sa amahan ang akusasyon nga pagpanglugos sa iyang tulo ka mga anak sa Barangay Musi-Musi lungsod sa Balingasag, Misamis Oriental.
Nagtingkagol sa Misamis Oriental Provincial Jail (MOPJ) si Jonathan, 36, minyo, lumad nga taga Los Banson, lungsod sa Jasaan human gipasakaan og kasong pagpanglugos sa iyang tulo ka anak nga mao si sila si Jessa, 17; Ana, 6, ug Liza, 1 anyos (tinuod nga ngalan gipugngan) mga mulopyo sa maong dapit.
Si Jonathan nga nahinabi sa Sun.Star Superbalita hugot nga nihimakak sa akusasyon batok sa maong pagpanglugos.
Gibutyag sa amahan nga gimahal niya pag-ayo ang iyang mga anak ug dili niya mahimo ang maong alegasiyon.
Apan nasayran nga ang anak nga si Ana ang nitug-an sa iyang maestra kabahin sa gihimong paghinol ug paglugos niini pipila na ka adlaw ang nilabay sa mismong puloy-anan human bag-o lang nahidangat sa maong lugar ang 6 anyos aron didto mo-eskwela.
Giingong ang 17 anyos nga anak niini nagpuyo sa iyang ayaan tungod sa gihimo sa ilang amahan kanila.
Nitumaw usab ang taho nga lakip sa gilugos niini ang usa ka tuig nga anak pinaagi sa paggamit sa kamot sa suspetsado.
Apan ang tanang akusasyon gihimakak sa suspetsado gani dihang gisikop kini sa kapolisan niadtong Biyernes nisuway kini sa paghikog sulod sa prisuhan gamit ang panapton tungod kay dili niini madawat ang tanang akusasyon.
"Wala gyod na nako gibuhat, kay palangga nako akong mga anak ug naningkamot ko nga mahatag ilang gusto," matud ni Jonathan.
Gani, nagmarka pa ang hiniktan sa iyang liog nga nasapon sa kaubang piniriso hinungdan nga napugngan ang paghikog.
Pagpangisda ug pagmahneho og sikad ang panginabuhi ni Jonathan diin niadtong Biyernes gikan pa kini sa iyang pagpamasahero dihang kalit nga gisikop sa kapolisan sa Balingasag Police Station.
Nasayran nga wala masayod ang inahan sa biktima nga anaa lamang sa puloy-anan ug dili kini makatuo sa gihimo sa iyang bana ug naglibog pa ning panahona.
Linkback:
https://tubagbohol.mikeligalig.com/index.php?topic=23546.0
