Ni Guam P. Logroño
Sunday, March 6, 2011
PULIS gibahingan-patay dihang nipauli paingon sa ilang panimalay gikan nag-inom sa usa ka videokihan sa Sitio Riverside, Barangay Arpili, lungsod sa Balamban, kagahapon sa alas 5:00 sa kaadlawon.
Si PO1 Romel Taping 32, minyo, ug sakop sa Regional Public Safety Battalion (RPSB) nga nagbasi sa lungsod sa Sibonga, ang namatay paglabay sa usa ka oras sulod sa tambalanan sa Toledo City District Hospital.
Ang biktima nadawat sa serbisyo niadtong 2009 ug lumad nga taga dakbayan sa Toledo apan naminyo sa taga Barangay Arpili.
Si Chief Insp. Januario Sario, hepe sa Balamban police, nagkanayon nga ang biktima uban sa iyang bayaw nga si Gerd Paculba ug mga higala nag-inom sud sa videokihan.
Dihang nipauli na kini sa iyang panimalay pipila ka metros ang gilay-on gikan sa dapit, kalit lang gipusil sa wala mailhing tawo sud sa makadaghang higayon diha sa iyang kamot ug iyang tiyan.
Ang bayaw niini nga si Gerd nga nakabati sa buto-buto sa armas kinsa padulong na usab nga mopauli sa ilang panimalay daling nisusi, apan nakurat siya dihang iyang nakit-ang nag-ubo na ang biktima nga nagkadugo.
Nangayog panabang sa mga silingan ug mga higala dali nilang gidala sa tambalanan sa dakbayan sa Toledo, apan nabugto-an kini sa kinabuhi.
Si Chief Insp. Sario, miingon nga nailhan na nila ang tulo ka mga batan-ong suspek nga maoy responsabli sa krimen, diin nahanaw na sa lugar atol sa hot pursuit operation.
Gibutyag niini nga usa sa mga suspetsado ang gikatahong gika-engkwentro sa biktima dihang gibadlong niini human dunay nahitabong kagubot sa maong lugar.
Giingong nibahad sa biktima ang maong suspetsado, kini basi sa gibutyag sa bayaw, asawa ug mga silingan niini diha sa lugar.
Nagdumili hinuon si Sario sa pagbutyag sa pangalan sa tulo ka mga suspetsado hangtud dili nila mapasakaag kaso ingon man madakpan.
Ang biktima una kining nag-inom mga alas 10 sa gabii diha sa ilang panimalay apan nibalhin kini ngadto sa videkihan uban sa bayaw ingon man mga higala.
Gani sa wala pa kini mamatay ni-order pa kinig usa ka botelya sa beer una pa nipauli dayon gi-ambush.
Nakuha didto sa crime scene ang usa ka deformed slug sa kalibre .45, samtang dunay mga residenti sa lugar nga nakakitag duha ka mga batan-ong nagkawo nga sayong niduaw sa lugar nga daw dunay gipangita.
Gipatik sa mantalaang SuperBalita Cebu Marso 07, 2011. Linkback:
https://tubagbohol.mikeligalig.com/index.php?topic=38617.0
