Ni Romeo Limpangog/EIM (Banat) Updated August 22, 2011 12:00 AM
CEBU, Philippines - Gitulis sa duha ka armadong lalaki nga nagsakay og motorsiklo ang duha ka babaye nga
naglakaw pauli sa ilang panimalay alas-11 pasado ang takna sa miaging gabii sa Lower Tabok, dakbayan sa Mandaue.
Ang mga biktima mao sila si Maria Victoria Niemes, 31, taga sitio Dunggoan sa barangay Basak, dakbayan
sa Mandaue ug Imelda Paez, 45, taga sitio Kamanggahan, barangay Tabok sa mao gihapong dakbayan.
Si PO2 Heraclio Gamboa sa kapolisan sa Presinto 3 sa Basak Police Station sa Mandaue City Police (MCPO)
nga nahinabi sa Banat News miingon nga paingon na pauli sa ilang panimalay ang mga biktima dihang kalit
lang gihunongan sa motorsiklo nga giluwanan sa duha ka yagpison ug nga wala hiilhing mga lalaki.
Matud pa ni PO1 Gamboa nga sa paghunong sa motorsiklo sa atubangan sa mga biktima dali kining
miibot sa ilang mga armas ug gitionan ang mga biktima dungan ang pagdeklarar nga tulis.
Ang duha ka biktima nga nakalitan wala usab maglangan sa paghatag sa ilang salapi nga nagkantidad
og P30,000 gikan sa unang biktima duha ka mahalon nga cellphone, ug P2,000 nga salapi ug cellphone
niini ug uban pa nga mga importanteng mga butang.
Si PO1 Gamboa miingon nga human makuha sa duha ka tulisan ang salapi ug mga mahalon nga butang sa
duha ka biktima daling mipabulhot sa ilang motorsiko paingon sa lungsod sa Consolacion.
Dugang pa ni PO1 Gamboa nga dali nga gihimo sa kapolisan sa Presinto 3 ang paggukod sa maong lugar ang
duha ka tulisan kuyog usab sa duha ka biktima apan pipila ka oras sa ilang pagsuhid wala na gyod nila
makaplagi pa ang duha ka wala hiilhing tulisan. - BANAT NEWS
Linkback:
https://tubagbohol.mikeligalig.com/index.php?topic=43048.0
