Ni Darrel Carumba (Banat) Updated March 19, 2011 12:00 AM
CEBU, Philippines - Walo ang angol apil na ang upat ka mga menor de edad ug duha ka magtiayong magtutudlo human gidasmagan sa patrol car sa kapulisan ang pasahero-ang traysikol didto sa Public Plaza sa barangay Poblacion sa lungsod sa Bantayan isla sa Bantayan niadtong Miyerkules sa alas 6:20 sa gabii.
Ang drayber sa traysikol mao si Elesio Larrida, 50 anyos, minyo. Samtang ang mga pasahero nga na-angol mao ang magtiayong nga magtutudlo nga sila si Mario Layage, 42 anyos ug asawa niini nga si Phoebe June Layage, 37 anyos ug mga anak nga sila si Christian Dianos, 10 anyos ug John Phoebus, 8 anyos ug Marlyn Layage, 25 anyos, Vilma Villaceran, 38 anyos anak niining si Nelson Villaceran, 11 anyos ug Nina Claire Pacina, 12 anyos.
Samtang ang drayber sa Toyota Innova patrol car sa kapulisan nga nakadasmag mao si PO3 Larry Illustrisimo sa Bantayan Police.
Matod ni PO2 Lou Susvilla sa Bantayan Police dihang nahinabi sa Banat News ang patrol car gikan nga nagpa-develop og mga picture ug paingon nang mobalik sa police station samtang ang traysikol paingon na untang magpahatud ang mga pasahero didto sa Sityo Campo barangay Bantigue.
Apan aksidenti kining nadasmagan sa patrol car ug maayong pagkalabay sa ubang mga pasahero ug daling gihatud sa tambalanan dinhi sa maong lungsod apan wala hinooy nagrabihan ug nakagawas dayun human madapati og tambal gawas lang sa tulo ka mga bata nga pagka ugma na nakagawas.
Hinoon gi-areglo ra sa mga kabanay ang maong panghitabo human nipadayag usab og kaandam si PO3 Illustrisimo pag-abaga sa iyang obligasyon. (Darrel A. Carumba/WC)
Linkback:
https://tubagbohol.mikeligalig.com/index.php?topic=39227.0
