Ni Dennes R. Tabar
Saturday, February 26, 2011
LAIN na sab nga kontrobersiya ang nalambigitan ni Mandaue City Asst. Prosecutor Bienvenido Mabanto human siya gipasanginlang nipatid ug mipapriso na usab og laing drayber.
Ang drayber nagmaneho sa sakyanan nga nakasaghid sa sakyanan sa opisyal nga nag-parking sa usa ka mall sa dakbayan sa Mandaue.
Si Mabanto, kinsa vice-chairman sa Traffic Enforcement and Management Board sa kagamhanan sa dakbayan sa Mandaue, nimando sa mga sakop sa Special Weapons and Tactics (SWAT) ug sa pulis nga sakop sa traffic section nga nirespondi sa alarma nga ipabilanggo ang drayber.
Ang drayber nga gipriso sa Subangdako Police Station mao si Darwin Davon, 36, taga Tisa, dakbayan sa Sugbo,drayber sa van nga iya sa Generation Purified Ice 7 nga gipanag-iya ni Julian Sy.
Sigun sa report sa kapulisan nga niadtong Biyernes pasado alas 3:00 sa hapon si Mabanto niadto sa Park Mall sakay sa iyang Kia Sorento (plate no. WEG-700).
Samtang iya kining gi-park, nasaghiran kini sa sakyanan nga gimaniho ni Davon hinungdan sa pagkadaot sa walang kilid sa sakyanan ni Mabanto.
Hinuon ang drayber, human sa hitabo, wa mobiya sa lugar ug gipaabot nga mogawas si Mabanto sa Park Mall.
Giingong human gipahibawo si Mabanto, masuk-anon kining niabot ug giingong napatiran gyod ang drayber sa dihang nirespondi ang mg sakop Swat ug ang traffic police nga si PO1 Roselo Campo.
Nimando si Mabanto nga ipadala sa Station-2 aron ipa-priso.
Ang mga sakop sa Swat ug si Campo nagdumili unta sa pagtuman sa fiscal tungod kay alang kang PO1 Campo usa lang kini ka yano nga kaso sa damage to property apan namugos gyud si Mabanto.
Ang Subangdako Police Station nga way kalibotan sa hitabo, nisuwat sa ilang record nga malicious mischief, nga maoy kaso nga ipasaka ni Mabanto batok sa drayber.
Si Davon gusto pa unta nga magpa-medical exam human siya maigo sa patid ni Mabanto apan wa kini mahitabo tungod kay napriso na kini.
Samtang ang record sa traffic section igo lang gibutang nga kasong damage to property ug ang ilang gihimong action mao ang pag-isyu og Temporary Operators Permit (TOP).
Nasayran nga si MCPO Director Noel Gillamac niisyu na og kamandoan sa iyang traffic section nga wa nay driver nga prisuhon sa kaso nga damage to property tungod kay mahimo raman kining masabot-sabot sa duha ka mga habig ilabi na kon pulos adunay insurance.
Si Mabanto gisuwayan unta sa Sun.Star Superbalita sa pagkuha sa iyang habig apan wa gyud siya motubag.
Nasayran nga di lang kini maoy unang higayon nga dunay gipabilanggo si Mabanto.
Niadtong Nobyembre sa miaging tuig usa ka drayber sa bus nga si Rolando Lequin nipasangil gisagpa siya sa piskal human masaghiri ang iyang sakyanan apan mao na hinuon kini ang nabilanggo sa Basak Police Station-3.
Niadtong Disyembre usa usab ka Japanese national nga si Tamosu Miyauchi nga iya usab nga naengkuwentro diha sa karsada ug nipasangil usab nga gikulata siya ni Mabanto ug gipabilanggo usab sa Station-2 ug gipasakaan og kasong malicious mischief.
Gipatik sa mantalaang SuperBalita Cebu Pebrero 27, 2011. Linkback:
https://tubagbohol.mikeligalig.com/index.php?topic=38350.0
