Ni Vincie L. Monterde
LAING kontrobersiya ang giatubang sa sinagop ni Mayor Soc Fernandez sa dakbayan sa Talisay nga si Joavan.
Gipasanginlan na sab si Joavan Fernandez nga namusil sa cashier’s booth sa Shell gasoline station sa Barangay Bulacao, Talisay human gibalibaran nga makapatubil sa iyang sakyanan kay way dalang baÂyad.
Ang insidente gibanabanang nahitabo alas 12:30 kagahapon sa kaadlawon.
Ang pumpboy nga si Efren Nuro, 21, ulitawo nga taga sityo Laguna, Bulacao, Cebu City maoy nisumbong sa kapulisan sa Talisay sa hitabo.
Si SP03 Jerome Abatayo, ang radio operator sa Talisay police station nitug-an sa Sun.Star Superbalita nga base sa sumbong ni Nuro, niabot si Fernandez sa gasoline station ug nimando nga patubilan ang iyang sakyanan nga Honda CRV.
Apan gibalibaran si Fernandez tungod kay dunay mando sa management nga di sa kini patubilon kay gipugngan ang account niini.
Mao na lay nadunggan sa mga kawani sa gasoline station ang sipa nga buto sa armas ug nabuak na ang bildo sa cashier’s booth.
Matod ni SP03 Abatayo nga wa gyud hinuon motumbok ang mga kawani sa gasoline station nga nakakita sila ni Fernandez nga maoy namusil.
Niadtong buwan sa Septiyembre, si Fernandez gialarma usab nga nagpabuto og armas human gibalibaran nga makautang og kuwarta didto sa Barangay Dumlog.
Ang 60-anyos nga negusyante nga si Ignacio Gonzaga Enjambre nagpa-blotter sa hitabo ngadto sa kapulisan.
Si Supt. Eddie Recamara, hepe sa kapulisan sa Talisay nipasalig nga imbistigahon ang mga kagubot nga nalambigitan sa sinagop ni Mayor Socrates Fernandez.
Linkback:
https://tubagbohol.mikeligalig.com/index.php?topic=57497.0
