Piso-piso “ATM†sa mga aseras ipatangtang sa siyudad
Ni Rene U. Borromeo (Banat) | Updated January 29, 2013 - 12:00am
CEBU, Philippines - Ang mga sakop sa City Hall Prevention Restoration Order Beautification Enhancement (PROBE) giawhag karon nga sakmiton ang mga “Automated Tubig Machines†nga anaa ra gibutang sa aseras.
Si City Health Officer Stella Ygoña miingon nga risgo kaayo sa panglawas sa katawhan ang pagbutang sa maong mga automated water vending machines diha sa aseras kay mahimo kining hugaw-hugawan sa mga badlongon sa katilingban.
Matud ni Ygoña nga ang mga sakop sa PROBE kinahanglang mosakmit niining mga Automated Tubig Machines kon ATM nga masakpan nga gibutang ra diha sa aseras nga walay nagbantay.
Gitataw ni Ygoña nga mahimong butangan o binuangan o ba kaha hiloan ang nozzle o gripo sa ATM nga makadaut sa panglawas sa mga tawo nga makainom sa tubig.
Usa ka Maria Sinanggote nga naabtan sa Banat News nga nagpalit og tubig gikan sa usa ka ATM diha sa aseras sa dalan P. Burgos eskena V. Gullas mihulagway nga nindot ang pagbutang sa maong mga automated tubig machines apan angay nga dili kini diha sa aseras.
Matud ni Sinanggote nga dili imposible nga dunay mga tawo nga magbinuang pagbutang og hugaw sa gripo ug labaw sa tanan ang peligroso kun dunay magbinuang pagbutang og hilo.
Ang usa ka tawo makainom na og bugnaw nga tubig pinaagi lang sa paghulog og piso ngadto sa ATM. Ang labing barato nga bottled water gibaligya karon sa tag P10 ngadto sa P15 ang matag usa, depende sa kompaniya nga naghimo niini.
Ang hepe sa PROBE nga si Raquel Arce miingon nga makigtambayayong siya ni Dr. Ygoña aron magiyahan siya kun hain ang mga ATM nga angay’ng sakmiton.
Sa pakisusi sa Banat News nasayran nga ang mga Automated Tubig Machines nagkatag lang sa lainlaing mga aseras. Gawas sa ATM, duna sa’y mga gitawag og Automated Coffee Machine diin ang usa ka tawo makainom og init nga kape pinaagi sa pagbayad og P5.
Nasayran nga ang mga automated tubig machines dili lang kay mikatap dinhi sa dakbayan kun dili apil na sa ubang mga dapit sa Kabisay-an ug Mindanao. Ang usa ka gallon sa purified water mapalit lang og P15 apan mosapi kini og kapin sa P100 kun ipaagi na sa ATM. (/EIM) (BANAT NEWS)
Linkback:
https://tubagbohol.mikeligalig.com/index.php?topic=66438.0
