MikeLigalig.com

Ni JEEPY P. COMPIO


GITUOHANG nagtago-tago karon dinhi sa siyudad sa Davao ang usa ka pari sa usa ka simbahan (di Katoliko) didto sa North Cotabato nga giakusahan nga nag-among-among sa 22-anyos nga babaye.

Subay sa impormasyon nga nakalap sa Sun.Star SuperBalita, giingong mireklamo ngadto sa mga otoridad ang 22-anyos nga babaye human siya giingong gibiyaan sa pari nga nagpasalig kaniya nga pakaslan siya human sa nahitabong pagkunsumo kaniya.

Giingon nga nahitabo ang pangabuso sa pari ngadto sa babaye niadto pang bulan sa Mayo 2015, diin wa dayon kini misumbong sa mga pulis gumikan mipasalig ang pari kaniya nga magmugna sila'g pamilya.

Dugang sumbong sa babaye nga gikulong siya sa kombento ug gihimong sex slave sa higayon nga uhawon ang pari sa lawasnong kalipay.

Nasayran pa, nga kada gabii siya hilabtan sa pari, apan gihilom lamang gyud niini ang panghitabo aron nga panalipdan ang iyang dungog ug dungog sa simbahan nga gialagaran sa pari.

Sa nakalabay nga adlaw, human wa na niya makita ang pari, misugilon na ang babaye ngadto sa iyang mga kabanay aron motabang sa paghimo og aksiyon labot sa nahitabo kaniya.

Giandam na sa kapulisan ang kasong lugos batok sa pari sa usa ka sekta sa simbahan sa dapit nga gituohang nagtago-tago dinhi sa dakbayan.


Gipatik sa mantalaang SuperBalita Davao Nobiembre 15, 2015

Linkback: https://tubagbohol.mikeligalig.com/index.php?topic=81382.0