Ni Guam P. Logroño
Thursday, February 2, 2012
TINDERO og fried chicken sa dakbayan sa Naga ang gipusil-patay atubangan sa iyang kapuyo sa Barangay Balilong, dakbayan sa Naga, alas 3:30 sa hapon kagahapon.
Si Marlon Capablanca, 27, taga Barangay Mainit sa Naga gipusil sa usa sa tulo ka mga lalake nga nagsakay og motorsiklo nga nakataptap sa ilang mga nawong.
Si SPO2 Ian Quitayen, imbestigador sa kapulisan sa Naga nga nahinabi sa Sun.Star Superbalita, niingon nga ang biktima nanindag fried chicken atubangan sa eskwelahan sa maong dapit.
Sa pagpanglimpiyo niini sa palibot ingon man sa iyang tulodtulod nga tindahan sa fried chicken aron sa pagpangandam sa ilang pagpa-uli.
Kalit nga nibutho ang tulo ka mga tawo nga nagsakay sa kolor itom nga motorsiklo ug ang ikatulong angkas nga nagkawo ug nagjacket nga nagtaptap sa nawong maoy nikanog.
Gipusil gilayon niini ang biktima diha sa iyang ulo hinungdan nga nahagba apan gisiguro gyud sa gunman nga mapatay ang biktima gi-usban pa niini makaduha kahigayon.
Human niini paspas nga nisibat ang mga mamumuno sakay sa motorsiklo paingon sa dakbayan sa Toledo, diin gihulgway sa mga saksi nga nga ang driver naka-full-face helmet ingon man ang laing ikaduhang angkas.
Matud ni SPO2 Quitayen, nga ang kapuyo na-shock sa maong insedenti sanglit atol sa pagpusil sa mga suspek nagkugos pa kini sa ilang duha ka bulan nga masusu.
Ilang nasuta nga ang biktima walay record sa ilang Barangay ug sa maong dapit sanglit maayo kining tawo.
Apan ilang gisubay karon ang imbestigasyon labot sa shooting niadtong mi-aging bulan diin ang maguwang sa biktima gipusil apan wala mamatay.
Giingong ang suspetsado niini nakapiyansa sa maong kaso, ug nasuta nga ang biktima maoy kuyog-kuyog sa iyang maguwang nga nag-atiman sa kaso niini.
Karaang bangi sa pamilya nga giingong naglabanay ang matag kabig maoy gisubay nga imbestigasyon sa kapulisan nga motibo sa krimen.
--Gipatik sa mantalaang SuperBalita Cebu Pebrero 03, 2012. Linkback:
https://tubagbohol.mikeligalig.com/index.php?topic=47007.0
