NABUNGKAG ang tuhod sa usa ka manakaay og lubi dihang girakrakan sa wala mailang mga suspetsado kagahapon mga alas 5:00 sa kaadlawon sa Sitio Salawagan, Barangay Ili-Ilihon lungsod sa Salay, Misamis Oriental.
Giila ang biktima nga mao si Hector Manzanares, 49, residente sa susamang barangay.
Gibutyag ni Police Senior Inspector Delos Santos hepe sa Salay Police Station nga mga alas 9:00 na sa buntag nila nadawat ang report gikan sa kagawad sa maong barangay kalabot sa pagkadiskubre sa patayng lawas ni Manzanares.
Ang asawa sa biktima nibutyag nga sayo pa kaayo sa kadlawon moadto sa kalubihan iyang bana aron mananggot.
Ang mga silingan sab sa dapit nibutyag nga aduna silay nadungog nga unom ka sunod sunod nga buto nga gitouhang niadtong tungora gipusil ang biktima.
Dugang ni Delos Santos nga nagduda sila nga giatangan na ang biktima nga paingon sa kalubihan usa gipusil. Blanko usab sila kinsa ang nihimo niini labina walay gikareport nga kaaway ang biktima.
Ang asawa nibutyag sa kapolisan nga dili rason ang pagkapalahubog sa iyang bana aron kini patyon.
Migawas ang report nga hinimoan sa NPA apan gibutyag ni Delos Santos nga dili sila makapanumangil apan usa sa ilang lantawon tungod kay gidudahan nilang high powered firearms ang gigamit sa pagpusil sa biktima. (SVB)
Gipatik sa mantalaang Superbalita Cagayan de Oro Abril 05, 2016.
Linkback:
https://tubagbohol.mikeligalig.com/index.php?topic=82155.0
