MikeLigalig.com

COTABATO CITY -- Patay ang usa ka mag-uuma human gipusil alas 10:35 sa gabii niadtong Miyerkules.

Giila ang biktima nga mao si Jaod Vargas, 41, minyo ug molupyo sa Purok Magungaya, Mother Bagua, sa dakbayan.

Si Cotabato City Police Office Director Rex Anongos nagsulti nga nahitabo ang pagpamusil sa dihang migawas ang biktima sa ilang balay aron nga mangihi.

Apan kalit nga dunay duha ka mga lalaki nga miduol ug gipusil siya.

Daling gitabang ang biktima sa iyang pamilya ug gidala sa Cotabato Regional and Medical Center, apan gideklara siya sa nag-atiman nga doktor nga dead on arrival.

Nasayran nga nakangkon ang biktima og samad pinusilan sa dughan ug nawong nga maoy hinungdan sa iyang kamatayon.

Ang kapulisan padayon nga naghimo og imbestigasyon sa hitabo aron nga mailhan ug mapasakaan og kaso ang mga suspetsado. (Edgar E. Fuerzas)


Gipatik sa mantalaang SuperBalita Davao Septembre 18, 2015.