Ni Raymond Abarcas ug Romeo T. Limpangog/EIM (Banat) | Updated June 18, 2015 - 12:00am
CEBU, Philippines - Usa ka lalaki nga giingong wanted tungod sa kasong murder napusilan patay sa kapulisan human matud pa misukol dihang gi-serve ang iyang warrant of arrest diha sa Riverside, Poblacion Oriental sa lungsod sa Consolacion.
Pasado alas-6 kagahapon sa buntag ang kapulisan sa lungsod sa Consolacion inubanan sa mga sakop sa SWAT-CPPO nihatud sa warrant of arrest batok ni Vicent Vibar.
Ang warrant of arrest giisyu ni Presiding Judge Mercidita Ygbacio sa RTC-7 Branch 28 Mandaue City tungod sa kasong murder.
Matud ni Senior Police Officer 1 Renerio Patillas, desk officer sa Consolacion Police Station, pag-abot sa mga operatiba sa balay ni Vibar gisugat sila og pusil niini.
Matud pa gituktok unta sa mga polis ang pultahan sa suspek apan pag-abli ni Vibar diretso kini namusil ug naigo sa kamot si PO3 Roy Menguito nga sakop sa SWAT-CPPO.
Dugang ni Patilla, gilayog sa kapulisan ang suspek apan giingong dili kini magpadakop ug suway nga namusil pag-usab sa mga polis hinungdan nga ilaha kining gibawsan.
Napusilan si Vibar sa nagkadaiyang bahin sa lawas ug gidala sa Eversely Child Sanitarium Hospital apan gideklarar nga dead on arrival na kini.
Narekober sa kapulisan ang kalibre .45 nga armas nga dunay magazine nga may sulod nga mga bala, usa ka basiyo sa .45 kalibre nga iya sa suspek, duha ka basiyo sa .9mm nga iya sa mga polis. (Decemay P. Padilla/EIM)
Linkback:
https://tubagbohol.mikeligalig.com/index.php?topic=80228.0
