Ni Sheriza Mae Uy (Banat) | Updated May 13, 2015 - 12:00am
CEBU, Philippines – Gibandol nga syringes ug mga dagom niini natagak gikan sa kinatawo sa usa ka babayeng moduaw unta og priso sa Cebu City Jail niadtong Sabado.
Giila ang suspetsado nga si Irish Jane Valero, 31, lumad nga taga Sitio Kalubihan, Banawa, Barangay Guadalupe dakbayan sa Sugbo
Sumala pa ni CCJ Jail Warden Johnson Calub, bisitahon unta ni Valero ang iyang kapuyo nga si Michael Sansan,38, nga adunay kasong murder.
Si Calub nga nakahinabi sa mga tigbalita human sa regular meeting sa Police Coordinating and Advisory Council kagahapon, kabahin na sa ilang gipahugtang seguridad ang pagsiksik sa mga dala sa mga bisita ug ang estriktong body search sa tanang moduaw, babaye man o lalaki aron way makalusot nga kontrabando sa prisohan sama sa ilegal nga drugas.
Usa na niini ang pagpahubo sa mga babayeng moduaw kauban sa mga babayeng jailguards sud sa usa ka lawak alang sa body searching.
Matud pa ipa-squat ug paambak-ambakon ang mga babayeng dalaw ug samtang gihimo kini ni Valero dunay natagak nga gibandol nga butang gikan sa iyang kinatawo.
Sa pagsusi sa jailguards, napulo diay kini ka syringes ug mga dagom niini nga giputos og condom.
Niadtong Lunes, gipasakaan og kaso sa CCJ si Valero diha sa piskalya apan nakapiyansa.
Si Bise Mayor Edgardo Labella mimando nga i-ban na si Valero sa CCJ.
Nasayran nga dili kini maoy unang higayon nga nasakpan si Valero sa CCJ, niadtong Marso karon gihapong tuiga nasakpan kining nagdala og nubain ampoules sa Cebu City Jail nga iya gihapon gipaslak sa iyang kinatawo. -/EIM (BANAT NEWS)
Linkback:
https://tubagbohol.mikeligalig.com/index.php?topic=79956.0
