P2 M nga mga alahas nakit-an
Ni Dennes R. Tabar
Wednesday, January 18, 2012
GIBANA-BANA nga mokabat sa P2 milyones nga balor sa mga alahas ang napalgan sa sa mga basurero sa dumpsite sa Brgy. Umapad, dakbayan sa Mandaue niadtong Enero 12, 2012.
Ang mga alahas apil sa giingong basura nga nahakot sa mga garbage truck sa barangay Cabangcalan dihang nakaplagan sa mga basurero.
Uban sa mao nga mga alahas naprenda na, diin ang usa gidawat sa pawnshop og P127,000 samtang ang laing usa gidawat og P15,000 sa usa ka alahero.
Gibawi sa mga sakop sa Intelligence and Detection Management Branch (IDMB) sa Mandaue City Police Office (MCPO) ang mga alahas nga gipang-uli sa mga basurero ingon man ang kuwarta nga nahabilin gikan sa prenda.
Duna nay basurero nga namalit og mga dapat alang sa iyang guba nga balay ug tipik usab niini nahatag sa pamilya sa usa ka bata nga masakiton.
Hangtod kagahapon sa hapon wa pay ni-claim sa mao nga mga alahas kay bisan ang pamilya sa usa ka negusyante, kinsang class ring lakip sa napalgan uban sa mga alahas, wa man moangkon nga ilaha ang tanang napalgan sa kapulisan.
Tungod niini, si Chief Insp. Michael Bastes, hepe sa IDMB, niingon nga ilang i-turn over una kang Mayor Jonas Cortes ang mga alahas ug kuwarta alang sa safekeeping.
Una niini, ang kapitan sa barangay Cabangcalan nga si Martin Cosedo nangayog tabang sa mga sakop sa IDMB niadtong Dominggo human nigawas ang report nga ang ilang garbage truck nakalabay og basura nga adunay mga alahas nga napalgan sa mga basurero sa Umapad dumpsite niadtong Enero 12 sa udto.
Sa dihang sa gisusi sa kapulisan sa IDMB pinangulohan ni Insp. Ramil Morpos niadtong Martes sa udto, positibo ang taho human niangkon ang mga basurero nga nakakuha silag sako nga hapit na masunog ug sa ilang pagbitad nangahulog ang daghang mga alahas.
Si Rodrigo Corta, 55, nagpuyo duol ra usab sa dumpsite, usa sa tulo ka mga basurero nga nakakita ug nakakuha sa mga alahas nga nahinabi sa Sun.Star Superbalita, niingon nga ang usa sa mga bracelet nga iyang nakuha gipaprenda niya sa iyang amigo ngadto sa usa ka pawnshop.
Kini gidawat og P127,000.
Dali nga nakapamalit ang pamilya ni Corta og mga kahoy ug kabilya alang unta sa pagpaayo sa ilang gubaon nga balay samtang ang uban niini ilang gipanghatag sa mga silingan ug nipatambal pa sa bata sa ilang silingan nga nakasakit.
Samtang ang tawo nga iyang gisugo sa pagprenda iyang gihatagan og P16,000 isip pahalipay.
“Abi namo untag grasya na. Para unta to tambal sa akong duha ka anak nga adunay goiter. Unya kuhaon ra diay sa mga pulis,†asoy ni Corta
Matod niya nga nagtuo silang tubag naang mga alahas sa ilang mga pag-ampo.
Na-recover sa kapulisan sa Mandaue ang usa ka gold bracelet, gold necklace with pendant, duha ka bulawan nga singsing nga adunay 24 ka mga diamond, usa na niini ang class ring sa University of San Carlos class 1962 nga dunay ngan nga Vicente Tan.
Ang pamilya ni Tan nanag-iya og pabrika sa dried mangoes.
Samtang nakuha usab ang resibo sa usa ka pawnshop human sa naprenda ni Corta nga gold bracelet nga mokantidad og P127,000, apan P36,500 na lang ang nauli.
Si Eda Montecalvo, usa ka basurera, niangkon nga nabaligya na niya ang alahas sa tawo nga miagi lang sa dapit sa kantidad nga P15,000.
Samtang ang ika-tulong basurero nga si Antonio Quizon nga maoy unang nakakita niuli sa usa ka bracelet ngadto sa mga pulis.
Si Montecalvo wa nay nauli nga kuwarta tungod kay matod niya nang nagasto kay iyang gipalit og nebulizer alang sa iyang anak nga hubakon.
Sa imbestigasyon sa kapulisan ilang giduahan nga ang tag-iya sa alahas mao si Tan human nga lakip sa nakuha mao ang usa ka class ring nga adunay ngan niya.
“Among natawgan ang asawa. Gitawag na usab sa kapitan. Wala man kuno sila mawagtangi,†asoy ni Morpos.
Gibutyag usab ni Cosedo nga nahinabi sa Sun.Star Superbalita nga ni-deny ang pamilya ni Tan nga nawad-an sila og mga alahas.
Hinuon ang kapulisan mobalik pa sa balay ni Tan aron ila kining maestorya kon unsa nga nahitabo nga naapil man sa paglabay ang iyang class ring ug kon iya ba gyud usab ang mga alahas.
Ang mga basurero sa barangay Cabangcalan niangkon nga aduna silay nakuhang sinakong basura gikan sa kompaniya ni Tan nga mao ang Inday Dried Mangoes.
Apan sa higayon usab nga moangkon na si Tan nga sila nawagtangan og alahas, ila usab nga pangitaan og kamatuoran nga iya ba gayod ang mga alahas.
Si Morpos wala usab mosalikway sa pagtuo nga gikawat ang mga alahas ug gibutang lang sa basura ug balikon lang unta apan naunhan lang sila sa pagkuha sa mga garbage collector. --Gipatik sa mantalaang SuperBalita Cebu Enero 19, 2012.
Linkback:
https://tubagbohol.mikeligalig.com/index.php?topic=45851.0
