P2 M nga relo sa Koreano gikawat
Ni Dennes R. Tabar
KOREANO gikawatan sulod sa usa ka spa ug lakip sa nadala mao ang iyang relo nga giingong mokantidad og P2 milyunes.
Laing kaso sa kawat nga susama og modus nahitabo sab sa laing spa sa dakbayan sa Sugbo nga gituohang binuhatan sa samang suspek.
Matod sa kapulisan nga pasado alas 6 sa gabii niadtong Lunes, si Park Hwy Chang, 55, Koreano nga usa na ka Filipino citizen, taga Santo Niño Village, Barangay Banilad, dakbayan sa Sugbo, nagpa-foot spa sa Kagura Spa sa dalan A.S. Fortuna, Banilad, Mandaue City.
Sigun sa iyang asoy nga samtang siya nagpa-spa, iyang gibutang sa locker nga kinandaduhan sa maong establisemento ang iyang pitaka nga dunay sulod nga P20,000; duha ka mga iPhone nga mobalor og P20,000 ang matag usa ug mahalong relo de pulso nga Franck Muller nga mobalor og P2 milyones.
Pipila sa mga celebrity nga nagsul-ob sa mao nga brand sa relo naglakip kanila ni Elton John, Demi Moore ug Robin Williams.
Wa hinuon siya mosulti kon unsa nga model sa Franck Muller ang iyang relo.
Matod sa biktima nga dihang gikuha na niya ang iyang mga butang, wa na kini diha, apan sirado pa gihapon ang locker sa iyang pagsusi.
Gituohang nigamit og duplicate nga yawe ang k******n.
Si Jackie Cain, kinsa maoy in-charge sa spa niadtong tungora, dihang giimbistigar sa kapulisan sa Mandaue, nibutyag nga duha lang ang ilang mga kustomer sa maong higayon, ang Koreano ug ang usa ka b***t nga ilang nailhan sa ngalan nga Michael.
Dugang niini nga katulo na ningduaw sa ilang spa ang maong b***t.
Gani manglibre pa kini kanila og snacks. Nagtuo lang sila nga mangita ra kini og mga lalake.
Samtang giadto usab sa kapolisan ang usa ka edipesyo sa Banilad, dakbayan sa Sugbo nga dunay sauna sanglit nakadawat usab sila og report nga nakaÂbiktima usab ang maong suspek.
Si Marivic Hesta, kinsa receptionist sa usa ka gym nga adunay sauna nga nahimutang sa Country Mall, nibutyag sa kapolisan nga niadtong Biyernes usa ka Koreano usab nga ilang costumer nga naila nga si Sin Chang Kng gikawatan og bag sa locker niini nga dunay sulod nga P40,000.
Usa gihapon ka b***t nga nagpaila kanila nga si Mike Castro mao usab ang ilang gituohang nanghilabot.
Hinungdan nga gikuha karon sa kapulisan ang giingong video footage sa CCTV camera sa maong mga establisemento aron pag-ila gyud.
Gipatik sa mantalaang SuperBalita Cebu Septembre 26, 2012.
Linkback:
https://tubagbohol.mikeligalig.com/index.php?topic=55198.0
