Ni Romeo T. Limpangog (Banat) | Updated July 9, 2015 - 12:00am
CEBU, Philippines – Patay ang usa ka lalaki nga gipusil sa iyang silingan human sa ilang pagtambong sa husay sa barangay hall sa Barangay Mulao, Lungsod sa Compostela niadtong Martes sa buntag.
Si Police Officer 3 Michael Magallon, imbestigador sa Compostela Police Station miila sa biktima nga mao si Gonzalo Wagas Jr., 50, ug ang suspetsado mao si Alin Avila, 32, nagpuyo sa maong dapit.
Matud pa ni Magallon nagkabikil ang duha tungod sa tsismis maong gihusay sila ni Mulao Barangay Kapitan Asteria Tanjay. Apan human sila gihusay miuna og pauli ang suspek samtang nagpauwahi ang biktima.
Wa magtuo ang biktima nga atangan diay gihapon kini sa suspek ug dihang naagi sa nahitaboan ang biktima gipaulanan kini og bala sa suspek diha sa ulo ug sa buko-buko nga nakaingon sa iyang kamatayon.
Ang suspetsado dali nga mipahilayo sa maong dapit ug wala na kini maabti pa sa ilang panimalay sa mirespondeng mga polis. – /EIM) (BANAT NEWS)
Linkback:
https://tubagbohol.mikeligalig.com/index.php?topic=80461.0
