Ni Rey B. Pasaporte ug Verdiebon Zabala Codoy/PIT (Banat)
CEBU, Philippines - Gisaka sa kuwarto ang usa ka babaye nga tinun-an sa kursong nursing sa nagbinugtong tulisan samtang nahinanok sa pagkatulog sa giabangang apartment kagahapon sa kaadlawon sa Aznar Road sa sitio Katangkungan, barangay Sambag I ning siyudad.
Si Relia Mae Abao, 20, dalaga ug tinun-an sa kursong nursing sa usa ka inilang unibersidad sa dakbayan, gisuwayan paglugos sa suspek nga nagtion og kutsilyo sa iyang liog apan maisugon siyang misukol.
Si Abao nag-abang og apartment sa nahisgutang lugar apan lumad nga taga lalawigan sa Camiguin anaa karon sa Sacred Heart Hospital human nakaangkon og samad sa iyang tuong kamot ug garas sa iyang liog.
Ang suspek nga nagtabon og T-shirt sa iyang nawong ug nagkalo miagi sa kisame tungod sa kuwarto sa Aquita Apartment.
Ang mga sakop sa Mobile Patrol Group (MPG) daling miresponde sa maong alarma apan napakyas pagsikop sa suspek kinsa daling misibat palayo sa lugar.
Si PO2 Jovito Labra sa Theft and Robbery Section (TRS) sa Cebu City Police Office (CCPO) nagkanayon nga si Abao nakamata sa dihang gitionan og kutsilyo tumong sa iyang liog dayong kuha sa duha ka cellphone niini.
Si PO2 Labra nagkanayon nga gilabnot pa ang habol sa biktima dayon gimanduan nga pahuboon sa sapot niini ug didto na magsugod ang komosyon sa dihang misuway ang biktima sa pagsukol ug nakig-inilogay sa kutsilyo sa suspek. Nasamad ang tuong kamot sa biktima.
Dihadiha gipatiran si Abao sa suspek hangtod natumba ug pagkahuman giparok siya sa semento kaduha ka higayon ug pagkahuman mibalik kini og saka ngadto sa kisame.
Linkback:
https://tubagbohol.mikeligalig.com/index.php?topic=32598.0
