Ni Joy F. Tumulak
Wednesday, May 1, 2013
NAMATAY ang usa ka checker sa container yard human mapiit sa duha ka mga container van samtang siya gituohang nag text.
Ang nakaigo sa vans mao ang usa ka trailer truck nga way karga nga container sulod sa Pier 6 sa Cebu International Port pasado ala una kagahapon sa hapon.
Ang biktima nga patay nang nahulbot giila nga si Edgar Sollano, 50, taga sityo Lokata, Barangay Looc, siyudad sa Lapu-Lapu, kawani sa PBCS Agency, gidistino isip checker sa NMC Container.
Samtang ang nagmaniho sa trailer truck ug way gipresentar nga lisensya sa kapolisan nagpaila nga si Bobby Mendoza, taga Barangay Tinago, usa ka kawani sa Cebu Integrated Arrastre.
Matod ni SPO4 Rey Cuyos ug mga kauban sa Homicide Section sa Cebu City Police Office nga unang nakaresponde sa alarma nga anaa daplin sa dalan naglinya ang mga container van.
Ang matag container van dunay gintang nga usa ka metros nga igong malutsan og tawo.
Gituohan sa kapolisan nga ang biktima naggunit sa iyang cell phone samtang taliwa sa duha ka mga container van samtang nag nag-text ug nagsusi sa mga van nga way sulod.
Linkback:
https://tubagbohol.mikeligalig.com/index.php?topic=72378.0
