Ni Lesley Caminade-Vestil/WC (Banat) Updated March 12, 2011 12:00 AM Comments
CEBU, Philippines - Tungod sa halo nga iyang gigukod, namatay ang usa ka negosyante sa wala pa masayring hinungdan didto sa barangay Conalum, lungsod sa Argao sa ala 1:00 sa hapon.
Ang namatay nailhan nga si Antonio Alberca Robledo, 65, taga barangay Taguib lungsod sa Argao.
Sa pakighinabi sa Banat News kang Leonard Amarillo, konsehal sa barangay Usmad sa maong lungsod, nasayran nga ang biktima kinsa negosyante og hayop miadto sa Conalum kay mamalit og kahayopan.
Apan samtang naglakaw siya sa dalan nakasugat si Robledo og dakong halo , hinungdan nga iya kining gigukod sa kalibonan uban sa iyang mga kauban.
Apan tungod kay bakilid ang maong lugar inubanan usab sa hilabihang kainit sa adlaw, mihangak kuno ang biktima hangtod nga naglisud kini sa pagginhawa.
Unya kalit lang nawad-an sa iyang panimuot ang biktima hinungdan nga gitabang kini sa mga kaubanan ug nangayo kini og tabang pinaagi sa pagtawag sa radio sa barangay .
Matud pa ni Amarillo nga siya maoy nakatubag sa maong tawag ug uban sa iyang grupo ang 527 frequency modulator, daling migamit sa multicab sa barangay Usmad ug ilang gidala si Robledo sa Isidro C. Kintanar Memorial Hospital diin didto kini ideklarar nga dead on arrival .
Hangtod ning atong pagbalita wala pa masayri kun unsa gayud ang hinungdan sa kamatayon ni Robledo.
Samtang mihulagway si Amarillo nga usa ka physically fit si Robledo ug base sa iyang nasayran wala kini gipamati sa kalawasan. May mga pagduda usab nga basin iya sa engkanto ang maong halo. - (BANAT NEWS)
Linkback:
https://tubagbohol.mikeligalig.com/index.php?topic=38854.0
